БҚО-ның Антикор-волонтерлері жол жүру тарифінің негізсіз өсуінің алдын алды

БҚО бойынша Сыбайлас жемқорлыққа қарсы қызметтің волонтерлері қоғамдық көлікте жол жүру тарифтерінің құнын арттырудың негізділігін зерделеу барысында тасымалдаушылардың жергілікті атқарушы органдарға кірістерден асатын елеулі шығыстар туралы мәліметтер ұсынғанын анықтады.

Нәтижесінде қала әкімдігі жол жүру құнын 80 теңгеден 120 теңгеге көтеруді жоспарлаған болатын.

Бұл ретте жолаушылар мен багажды автомобильмен тұрақты тасымалдауды ұйымдастырудың үлгілік шартының 8-тармағына сәйкес елеулі бұзушылықтардың бірі маршруттың жиілігінің төмендігі (айына 70% - дан аз) болып табылады.

Онлайн режимде спутниктік қадағалау жүйесін зерделеу арқылы тұрақты автомобиль тасымалдарын ұйымдастыру шарттарында көрсетілген автобустар саны бойынша маршрутқа шыққан көліктің нақты санымен сәйкессіздік анықталды, бұл маршруттың жиілігінің төмендігін көрсетеді.

Осылайша, тасымалдаушылар нақты емес, болжамды шығындар туралы ақпарат берген.

Департаменттің ұсынысымен жол жүру құны мәлімделген 120 теңгенің орнына 100 теңгеге (бұрын - 80 теңге) ғана көтерілді.

Сонымен қатар, жолаушылардың жеңілдетілген санаты кеңейтілді: 7 жастан 18 жасқа дейінгі балалар; көру қабілеті нашар мүгедектерді ертіп жүрушілер. Олар үшін жол жүру құны қолма-қол ақшасыз 50 теңгені және қолма-қол төлеген кезде 100 теңгені құрайды.