Батыс Қазақстан облысында туризм саласындағы сыбайлас жемқорлық тәуекелдері қаралды
2025 жылғы 20 маусымда «Заң мен тәртіп» қағидатын іске асыру және нығайту мақсатында Батыс Қазақстан облысының Антикоррупциялық қызметі мен әкімдік бірлесіп, сыбайлас жемқорлыққа қарсы өңірлік комиссияның отырысын өткізді.
Отырысқа Сыбайлас жемқорлыққа қарсы іс-қимыл агенттігінің БҚО бойынша департаментінің басшысы Әділхан Сабуров, облыс әкімі Нариман Түрегалиев, прокуратура өкілдері, аудан әкімдері және салалық басқарма басшылары қатысты.
Күн тәртібінде туризм саласындағы сыбайлас жемқорлық тәуекелдеріне сыртқы талдау нәтижелері және бұрын берілген сыбайлас жемқорлыққа қарсы ұсыныстардың орындалуы қаралды.
Талдау барысында аймақтың географиялық қолайлы орнына қарамастан, туристік әлеуеті жеткілікті пайдаланылмай жатқаны анықталды.
2021 жылдан бері туризмді дамытуға жылына 15 миллион теңгеден аспайтын қаражат бөлінуде, оның көп бөлігі іс-сапарларға және формалды іс-шараларға жұмсалады.
Соңғы жылдары жаңа орналастыру нысандары ашылмаған, алайда жыл сайын семинарлар ұйымдастырылуда.
Субсидияларды тиімді пайдаланбау фактілері де анықталды: санитарлық тораптарға қолдау алған кәсіпкерлер олардың қолжетімділігін шектеп немесе келушілерден ақы алған.
Жол бойындағы қызмет көрсету саласында да мәселелер бар: облыста үш санитарлық-гигиеналық пункт жұмыс істейді, олардың екеуі бұзушылықтармен жұмыс істейді.
Талдау нәтижесінде негізгі туристік нысандарға транспорт қолжетімділігін жақсарту, мультимедиялық контентті дамыту, агротуризмді қолдау, visit-uralsk.kz сайты арқылы өңір брендін ілгерілету және тревел-блогерлермен ынтымақтастықты күшейту ұсынылды.
Сонымен қатар, экология және жол құрылысы салаларында бұрын берілген ұсыныстардың орындалу мониторингі тыңдалды.
2024 жылы берілген 112 ұсыныстың тек 74-і орындалғаны анықталды. Кейбір аудандардың пассивтілігі байқалады — мысалы, экологиялық қауіпсіздік бойынша ұсыныстардың тек 2 жағдайы толық орындалған.
Облыс әкімі Нариман Түрегалиев ұсынылған шараларды қолдап, жауапты тұлғаларға барлық ұсыныстарды сапалы орындауды қамтамасыз ету, сондай-ақ сыбайлас жемқорлыққа қарсы шараларды бұзу мен уақытылы орындамау үшін тәртіптік жауапкершілікті күшейтуді тапсырды.
Сонымен қатар, туризмді дамытудың жүйелі тәсілінің маңыздылығын және жергілікті атқарушы органдар қызметіндегі ашықтықты қамтамасыз етудің қажеттілігін атап өтті.
#Заң_мен_Тәртіп
#ЗАҢменТӘРТІП