Астана қаласының Сыбайлас жемқорлыққа қарсы қызметі елорданың үш локациясында «Қала бойынша қабылдау» акциясын өткізді

Қазақстан Республикасы Сыбайлас жемқорлыққа қарсы іс-қимыл агенттігінің Астана қаласы бойынша департаменті прокуратура, полиция басқармасының, мемлекеттік кірістер басқармасының және басқа да мемлекеттік органдардың қызметкерлерімен бірлесіп «Қала бойынша қабылдау» атты азаматтарға тегін құқықтық көмек көрсету бойынша көшпелі акция өткізді.

Консультациялық алаңдар мамандандырылған ХҚКО қызмет көрсету аймағында, сондай-ақ «Астана Mall» және «Хан Шатыр» сауда-ойын-сауық орталықтарында ұйымдастырылды.

Акция барысында елорда тұрғындары мен қонақтары сыбайлас жемқорлыққа қарсы заңнама, салық салу, әкімшілік және қылмыстық рәсімдер, мемлекеттік қызметтер көрсету және азаматтардың құқықтарын қорғау мәселелері бойынша білікті кеңестер алды.

Іс-шараның мақсаты халықтың құқықтық сауаттылығын арттыру, сыбайлас жемқорлыққа қарсы мәдениетті қалыптастыру және азаматтар мен мемлекеттік құрылымдар өкілдері арасында ашық және қолжетімді диалогты қамтамасыз ету болды.

Іс-шара халық тарапынан үлкен қызығушылық тудырды: бір күнде 300-ден астам адамға кеңес берілді, олардың көпшілігі форматтың қолжетімділігі мен ақпараттылығын оң атап өтті.

Астана қаласының сыбайлас жемқорлыққа қарсы қызметі азаматтардың мемлекеттік органдарға деген сенімін нығайту және ашықтық пен парасаттылық қағидаттарын ілгерілету мақсатында болашақта осындай іс-шараларды өткізуді жалғастыруды жоспарлап отыр.