Ақтөбе заң институтында адалдық және сыбайлас жемқорлыққа қарсы іс-қимыл мәселелері талқыланды

М.Бөкенбаев атындағы Қазақстан Республикасы Ішкі істер министрлігінің Ақтөбе заң институтында Сыбайлас жемқорлыққа қарсы қызмет департаментінің өкілдері курсанттармен және бастапқы даярлау тыңдаушыларымен кездесу өткізді.

«Заң мен Тәртіп» идеологиясын ілгерілету және Сыбайлас жемқорлыққа қарсы қызмет пен Ішкі істер министрлігі арасындағы бірлескен жоспарды іске асыру аясында өткен бұл іс-шараға 250-ге жуық курсант пен тыңдаушы, сондай-ақ институт басшылығы мен Сыбайлас жемқорлыққа қарсы іс-қимыл агенттігінің Ақтөбе облысы бойынша департаментінің өкілдері қатысты.

Қатысушыларға Сыбайлас жемқорлыққа қарсы іс-қимыл агенттігінің Ақтөбе облысы бойынша департаменті басқарма басшысының орынбасары, майор Аслан Құламанов және институт бастығы, полиция полковнигі Ғалымжан Есболаев құттықтау сөз сөйледі. Кездесу барысында қауіпсіздік қызметінің өкілдері мен Сыбайлас жемқорлыққа қарсы қызметтің еріктісінің баяндамалары тыңдалды, одан кейін курсанттар сұрақтарын қоя алатын белсенді диалог алаңы ұйымдастырылды.

Іс-шара барысында 2022-2024 жылдар аралығында өңірдің ішкі істер органдарында жасалған сыбайлас жемқорлық құқық бұзушылықтарын талдауға ерекше назар аударылды. Ақтөбе облысы бойынша Сыбайлас жемқорлыққа қарсы қызмет департаментінің деректері бойынша, көрсетілген кезеңде 30 сыбайлас жемқорлық қылмысы тергеліп, оның 24-і парақорлықпен байланысты болған. Сотталғандар қатарында патрульдік полиция қызметкерлері, көші-қон қызметінің, Қылмыстық-атқару жүйесі мекемелерінің өкілдері, сондай-ақ аудандық полиция бөлімдері мен ведомстволық бағынысты ұйымдардың басшылары бар.

Құқық қорғау органдарының болашақ қызметкерлерімен мұндай кездесулер сыбайлас жемқорлыққа нөлдік төзімділікті қалыптастыруға, құқықтық сананы арттыруға және әрбір қызметкердің жеке жауапкершілігін еске салуға бағытталған. Бұл заң мен тәртіпті тиімді қорғай алатын күшті және жемқорлықтан ада кадрларды даярлаудағы негізгі элемент болып табылады.

#Заң_мен_Тәртіп

#ЗАҢменТӘРТІП

#АдалАзама