бұқаралық ақпарат құралдары өкілдеріне арналған семинар

Алматы облысының аумақтық сайлау комиссиясы облыстың бұқаралық ақпарат құралдары өкілдеріне арналған семинар өткізді

2026 жылғы 20 шілдеде Алматы облысының аумақтық сайлау комиссиясы 2026 жылғы 23 тамызға тағайындалған Қазақстан Республикасы Құрылтайы депутаттарының сайлауын әзірлеу және өткізу мәселелері бойынша бұқаралық ақпарат құралдары өкілдеріне арналған семинар өткізді.

Семинардың спикерлері ретінде Алматы облысының аумақтық сайлау комиссиясының төрағасы Айтова Мейрамгүл Қазбекқызы және аумақтық сайлау комиссиясының мүшесі Қадыржанқызы Ақмарал сөз сөйледі.

Семинар барысында қатысушыларға Қазақстан Республикасы Құрылтайы депутаттарының сайлауын ұйымдастыру мен өткізудің ерекшеліктері, сайлау заңнамасындағы жаңашылдықтар жан-жақты түсіндірілді. Сондай-ақ сайлауалды үгіт жүргізу тәртібі, бұқаралық ақпарат құралдарының сайлау науқанын жариялау кезіндегі құқықтары мен міндеттері, сондай-ақ сайлау заңнамасының талаптарын сақтау мәселелеріне ерекше назар аударылды.

Бұқаралық ақпарат құралдарының өкілдері ағымдағы сайлау науқанына қатысты құқықтық және ұйымдастырушылық мәселелер бойынша толыққанды түсіндірмелер алып, өздерін қызықтырған сұрақтарға жан-жақты жауап алды.

Осындай семинарларды өткізу бұқаралық ақпарат құралдары өкілдерінің құқықтық сауаттылығын арттыруға, сондай-ақ сайлау науқанын жариялау кезінде сайлау заңнамасының нормаларын біркелкі қолдануды қамтамасыз етуге ықпал етеді.