Цифрлық экожүйе және IT саладағы алғашқы қадамдар

Alatau Hub алаңында ақпараттық технологиялар және цифрлық мамандықтар саласында мансаптық мүмкіндіктермен таныстыруға бағытталған «Цифрлық экожүйе және IT саласындағы алғашқы қадамдар» тақырыбында оқыту семинары өтті.

​Іс-шара барысында қатысушылар заманауи IT экожүйесінің құрылымымен танысты - стартаптар мен технологиялық хабтардан бастап венчурлік қаржыландыру құралдарына және цифрлық жобаларды қолдауға бағытталған түрлі бастамаларға дейінгі бағыттар қамтылды. Семинарға 30-дан астам цифрлық құзыреттерін дамытуға қызығушылық танытушылар қатысты, соның ішінде мектеп оқушылары, студенттер және жас мамандар бар.Сондай-ақ саланың негізгі даму бағыттары, сұранысқа ие дағдылар және кәсіби жолды бастауға арналған практикалық мүмкіндіктер қарастырылды.

​Практикалық мәселелерге ерекше назар аударылып, қатысушыларға мамандану бағытын таңдау, қажетті құзыреттерді меңгеру және IT саласында мансаптық траекторияны қалыптастыру бойынша ұсынымдар берілді. Сонымен қатар кәсіби профильді дамыту және цифрлық қауымдастыққа кірігу тетіктері түсіндірілді.

​Alatau Hub өңірдің технологиялық әлеуетін дамытуға бағытталған алаң ретінде жас мамандарды, кәсіпкерлерді және сала сарапшыларын біріктіреді. Осындай білім беру іс-шараларын өткізу тұрақты цифрлық ортаны қалыптастыруға және цифрлық экономика үшін жаңа кадрларды даярлауға ықпал етеді.