Балқаш ауданында «Қалқан-2025» тактикалық-арнайы оқу-жаттығуы өтті

2025 жылғы 29 сәуірде Алматы облысы Балқаш ауданының «Балқаш Таза су» мемлекеттік коммуналдық кәсіпорны аумағында «Қалқан-2025» тактикалық-арнайы оқу-жаттығуы өткізілді.

Іс-шара Алматы облысы бригадасының 24-ші аумақтық қорғаныс күзет ротасының жеке құрамының, сондай-ақ Балқаш ауданының барлық шұғыл қызметтерінің қатысуымен өтті.

Оқу-жаттығудың негізгі мақсаты — шартты жауынгерлік дайындық жағдайында әртүрлі мемлекеттік құрылымдардың үйлесімді іс-қимылын пысықтау. Іс-шараға қатысушылар қоғамдық қауіпсіздікті қамтамасыз ету, шұғыл көмек көрсету және күштік құрылымдар мен шұғыл-оперативті қызметтер арасындағы іс-қимылдарды үйлестіру бойынша тапсырмаларды орындауға дайын екендіктерін көрсетті.

«Қалқан-2025» оқу-жаттығуы жеке құрамның даярлық деңгейін арттыруға, әрекет ету алгоритмдерінің тиімділігін тексеруге және аумақтық қорғаныс шараларын күшейтуге бағытталған.

Осындай іс-шаралар ауданның ықтимал қауіп-қатерлерге дайындығын нығайтып, аумақтық қорғау жүйесінің негізгі құрылымдары арасындағы өзара әрекеттестікті күшейтуге ықпал етеді.