Наурызбай ауданы 500 шақырымнан астам жарық желісін тартпақ
Өңірлік коммуникациялар қызметінде өткен баспасөз конференциясында Наурызбай ауданының әкімі Назира Тоғызбаева ауданның қалай абаттанып, көше жарығын қалай дамытып жатқаны жөнінде баяндады.
«Жол жөндеумен қатар, біз көше жарығын дамытуға ерекше көңіл бөліп отырмыз. Бүгінде Наурызбай ауданының аумағы 95% жарықтандырылған. Жалпы жарық нүктесінің саны 26,5 мыңды құрайды, желілердің ұзындығы 500 шақырымнан асады», — деді Назира Тоғызбаева.
Оның айтуынша, «Алма Сити-5» тұрғын үй кешенінде биіктігі 4-тен 6 метрге дейінгі 573 жарық тірегі орнатылған. Оның 465-і жұмыс істеп тұрса, 108-ін әлі орнатып жатыр.
«Біз жаңа ықшам аудандарды қоса алғанда, тұрғын алаптардағы жарықтандыру мәселесін кезең-кезеңімен шешіп келеміз. Бұл кешкі уақытта тұрғындардың қауіпсіздігі мен жайлылығына тікелей әсер етеді. Нысандардың сапасы мен уақтылы пайдалануға берілуіне ерекше мән беріледі. Барлық жұмысты бақылауда ұстап отырмыз», — деді спикер.
Сонымен қатар, ауданда көгалдандыру мен абаттандыру жұмысы да қарқын алған. Биыл өтемдік еу жұмысының аясында 1900 ағаш, сондай-ақ 4600 ірі ағаш егу жоспарланған. Бұдан бөлек, 10 мың шаршы метрден астам көпжылдық өсімдіктер мен гүлзарлар еккелі отыр.
Жұмыс үлкен көшелерді, тұрғын алаптары мен жағалау аймағын қамтып, ауданның бірыңғай жасыл кеңістігін қалыптастыруға бағытталған. Қазір 25 мыңнан астам ағаш пен едәуір көлемдегі жасыл желекті күтіп-ұстау жағы қолға алынды.
«Көгалдандыру — жайлы қалалық ортаны қалыптастырудың маңызды бөлігі. Біз жаңа ағаш егіп қана қоймай, бар жасыл желекті де күтіп-баптаймыз. Жұмыстар үлкен көшелерден бастап, аула аумақтары мен жағалауларға дейін кешенді түрде жүргізіп жатыр. Бұл ауданның бірыңғай жасыл кеңістігін қалыптастырады», — деп қосты Назира Тоғызбаева.
Сонымен қатар, 2026 жылы Әшімов, Тәжиев пен Асқаров көшесінде буферлік аймақтар абаттандырылмақ. Жоба аясында көшет егу, аумақты көгалдандыру, арық жүйесін қайта жаңғырту, автоматты суару жүйесін орнату, техникалық тротуарлар салу мен газон тақтасын төсеу жұмысы қарастырылған. Аталған жұмысты жүзеге асыруға 400 млн теңге бөлінген.