Алматыда 2-11 тамыз аралығында Халықаралық жастар күніне орай ALMA LOVE 2026 қалалық жастар фестивалі өтеді. Фестиваль аясында қаланың әртүрлі аудандарында білім беру, шығармашылық, спорт, экология және еріктілік бағытындағы іс-шаралар ұйымдастырылады. Оған кемінде 20 мың адамның қатыспақ. Бұл туралы фестиваль ұйымдастырушысы Алматы қаласы Жастар саясаты басқармасының өкілдері айтты.
Биылғы ALMA LOVE фестивалі «Қала сенен басталады. Город начинается с тебя» атауымен өтеді. Фестивальдің негізгі идеясы – жастардың қаланың дамуына жеке жауапкершілігін арттыру, қоршаған орта мен қоғамдық мүлікке ұқыпты қарау, заңды құрметтеу және қоғамдық маңызы бар бастамаларға белсенді қатысу мәдениетін қалыптастыру.
«ALMA LOVE 2026 аясында қоршаған ортаға және қоғамдық ресурстарға жауапкершілікпен қарауға, үнемшілдік қағидаттарын насихаттауға, жасампаздық мәдениетін, өзара сыйластық пен белсенді азаматтық ұстанымды дамытуға ерекше назар аударылады», – деді Алматы қаласы Жастар саясаты басқармасының басшысы Азиз Кажденбек.
Фестиваль EcoVibe экологиялық челленджімен басталады. Оның қатысушылары аулалар мен қоғамдық кеңістіктерді көріктендіру жұмыстарына атсалысады. Комьюнити орталықтарда қаржылық сауаттылық, саналы тұтыну, экология және азаматтық белсенділік тақырыптарына арналған LEVEL UP білім беру ойындары өтеді. Ал Арбатта Avenue Talent жобасы аясында жас музыканттар, ақындар мен орындаушыларға арналған ашық сахна ұйымдастырылады.
Фестивальдің негізгі іс-шараларының бірі ALMA LOVE Talks форумы. Оған жас кәсіпкерлер, ғалымдар, спортшылар, қоғам қайраткерлері қатысып, тәжірибесін бөлісіп, жүзеге асырған жобалары туралы әңгімелейді.
Бағдарлама аясында Сайран жағалауында ашық аспан астындағы кино көрсетілімі, JasAlmaty Cup – 2026 футбол турнирі, Youth Nomads ұлттық ойындар фестивалі, «Жағалаудағы Абай» жобасы және «UNICEF Жастар форумы - 2026» халықаралық форумы да өтеді.
Фестиваль 11 тамызда «Шабыт» жазғы амфитеатрындағы мерекелік концертпен қорытындыланады. Концерт барысында танымал өнерпаздар өнер көрсетіп, белсенді жастарды марапаттау рәсімі жоспарланған. Кештің басты қонағы – Айқын Төлепберген.
Алматы қаласының әкімі Дархан Сатыбалды азаматтарды кезекті жеке мәселесі бойынша қабылдап, қала инфрақұрылымын дамытуға және тұрғындардың өмір сүру сапасын арттыруға қатысты кең ауқымды мәселелер бойынша өтінішін қарады.
Қабылдау барысында тұрғындар инженерлік және көлік инфрақұрылымын дамыту, аулалар мен қоғамдық кеңістіктерді көріктендіру, тұрғын үй-коммуналдық шаруашылық, жер қатынастары, экология, құрылыс, тұрғын үйді жаңарту, сондай-ақ әлеуметтік және мәдени нысандардың жұмысына қатысты сауалдарды көтерді.
Әрбір өтініш бойынша қала әкімі тиісті басқарма басшылары мен аудан әкімдерінің ақпаратын тыңдап, көтерілген мәселелерді жан-жақты пысықтау жөнінде тиісті тапсырма берді және олардың орындалу мерзімін белгіледі. Басқармааралық өзара іс-қимылды немесе қолданыстағы заңнама аясында шешім қабылдауды талап ететін сауалдар бойынша жауапты мемлекеттік органдарға өтініштерді қарау және өтініш иелерін хабардар ету тапсырылды.
Азаматтарды жеке қабылдау тұрақты негізде өткізіледі әрі тұрғындармен тікелей диалог орнатудың негізгі тетіктерінің бірі. Бұл өтініштерге жедел қарауға және басқарушылық шешімдер қабылдау кезінде қала тұрғындарының пікірін ескеруге мүмкіндік береді.
Алматының жеті ауданында екі апта бойы жылу желілеріне гидравликалық сынақ жүргізіледі
2026 жылы 3–14 тамыз аралығында Алматының жеті ауданының аумағында жылу желілеріне гидравликалық сынақтың екінші кезеңі өтеді. Бұл туралы «Алматы жылу жүйесі» ЖШС мамандары айтты.
Магистральдық және тарату құбырларына жүргізілетін тексеру барысында күн сайын сағат 04:00-ден 07:00-ге дейін қала тұрғындары мен қонақтарына сақтық шараларын қатаң сақтау ұсынылады.
Қауіпсіздік шараларының сақталуына қарамастан, кейбір учаскелерде судың жер бетіне шығуы немесе жол жабынының ішінара бұзылуы сияқты кезектен тыс жағдай орын алуы мүмкін.
Мұндай жағдайда ешқандай әрекетті өз бетіңізше жасамауыңызды, оқиға орнынан дереу кетуіңізді және бұл туралы «Алматы жылу жүйесі» ЖШС-не мына телефондар арқылы хабарлауыңызды сұраймыз: 351-27-62 (тікелей нөмір), call-орталығы: 341-07-00 немесе 341-07-77 (ішкі нөмірлері 1011 немесе 1014), сондай-ақ 109 бірыңғай байланыс орталығы.
Жылу желілеріне гидравликалық сынақ жүргізу кестесі
3 тамыз
* Алатау ауданы: Мөңке би көшесі – Бауыржан Момышұлы көшесі – Райымбек даңғылы – Фариза Оңғарсынова көшесі.
* Алмалы және Бостандық аудандары: Қарасай батыр көшесі – Тимирязев көшесі – Шагабутдинов көшесі – Розыбакиев көшесі.
3–4 тамыз
* Алмалы және Жетісу аудандары: Бөгенбай батыр көшесі – Мұратбаев көшесі – Мақатаев көшесі – Сейфуллин даңғылы – Тобаяқов көшесі – Желтоқсан көшесі – Мәметова көшесі – Абылай хан даңғылы.
3–14 тамыз
Бостандық ауданы:
* Асқаров көшесі – Мирас шағынауданы – «Алматы» шипажайы – Саин көшесі – әл-Фараби даңғылы – Қазақфильм шағынауданы – Рысқұлбеков көшесі – Каблуков көшесі – Бәсенов көшесі – Өтепов көшесі – Розыбакиев көшесі – Жароков көшесі – Алмагүл шағынауданы – Қожанов көшесі – ҚазҰУ – Тимирязев көшесі – М. Ганди көшесі – Назарбаев даңғылы.
* Лисянский көшесі – Розыбакиев көшесі – Жароков көшесі – Эксперименттік база – Қожанов көшесі – әл-Фараби даңғылы – Алмагүл шағынауданы.
* Орбита-1, Орбита-2, Орбита-3 және Орбита-4 шағынаудандары – Саин көшесі – Рысқұлбеков көшесі – Розыбакиев көшесі – Үлкен Алматы өзені – Өтепов көшесі – Жароков көшесі – Бәсенов көшесі.
Медеу ауданы:
* Тайманов көшесі – Чайкина көшесі – Достық даңғылы – Меңдіқұлов көшесі – әл-Фараби даңғылы – Жолдасбеков көшесі – Достық даңғылы – Байжанов көшесі – ІІМ шипажайы.
4–5 тамыз
* Алмалы, Медеу және Жетісу аудандары: Сейфуллин даңғылы – Тобаяков көшесі – Назарбаев даңғылы – Мәметов көшесі – Уәлиханов көшесі – Әйтеке би көшесі.
* Әуезов және Алмалы аудандары: Қарасай батыр көшесі – Райымбек даңғылы – Яссауи көшесі – Емцов көшесі.
5 тамыз
* Наурызбай ауданы: Райымбек даңғылы – Жүнісов көшесі – Абай даңғылы – «Алтын Орда» базары.
* Алмалы және Бостандық аудандары: Қабанбай батыр көшесі – Жандосов көшесі – Варламов көшесі – Айманов көшесі.
* Жетісу ауданы: Айнабұлақ-1, Айнабұлақ-2, Айнабұлақ-3 және Айнабұлақ-4 шағынаудандары, Көкмайса шағынауданы, Ангарская көшесі – Мақатаев көшесі – Палладин көшесі – Павлодар көшесі.
5–7 тамыз
* Алмалы, Жетісу және Медеу аудандары: Сейфуллин даңғылы – Рысқұлов даңғылы – Жангелдин көшесі – Райымбек даңғылы – Құратов көшесі – Гоголь көшесі.
6 тамыз
* Жетісу ауданы: Құлагер шағынауданы (Серіков және Ратушный көшелері), Рысқұлов даңғылы – Жансүгіров көшесі – Тихов көшесі – Глазунов көшесі.
* Наурызбай ауданы: Проектируемая көшесі – Айтбаев көшесі – Райымбек даңғылы – Алты Алаш көшесі.
6–7 тамыз
* Әуезов, Наурызбай және Бостандық аудандары: Төле би көшесі – Сәтбаев көшесі – Әшімов көшесі – Ислам Кәрімов көшесі.
7 тамыз
* Алатау ауданы: Мөңке би көшесі – Бауыржан Момышұлы көшесі – Фариза Оңғарсынова көшесі – Зерделі шағынауданы.
* Алмалы және Бостандық аудандары: Қарасай батыр көшесі – Өтепов көшесі – Розыбакиев көшесі – Байзақов көшесі.
10 тамыз
* Алатау ауданы: Райымбек даңғылы – Отырар көшесі – Рысқұлов даңғылы – Немирович-Данченко көшесі.
* Алмалы ауданы: Чокин көшесі – Петров көшесі – Қарасай батыр көшесі – Райымбек даңғылы.
10–11 тамыз
* Медеу, Алмалы және Бостандық аудандары: Гоголь көшесі – Курган көшесі – Сәтбаев көшесі – Чайковский көшесі.
11 тамыз
* Алатау ауданы: Аққайнар шағын ауданы – Мәмбетов көшесі – Үлкен Алматы каналының (ҮАК) оңтүстік жағы.
11–12 тамыз
* Алмалы және Бостандық аудандары: Әйтеке би көшесі – Назарбаев даңғылы – Шевченко көшесі – Желтоқсан көшесі – Сәтбаев көшесі – Сейфуллин даңғылы – Абай даңғылы – Досмұхамедов көшесі.
* Әуезов ауданы: Ұлықбек көшесі – Жандосов көшесі – Саин көшесі – Сәдуақасов көшесі.
12 тамыз
* Алмалы ауданы: Қарасай батыр көшесі – Ислам Кәрімов көшесі – Райымбек даңғылы – Масанчи көшесі.
12–14 тамыз
* Алмалы және Бостандық аудандары: Панфилов көшесі – Абай даңғылы – Желтоқсан көшесі – Тимирязев көшесі – Гоголь көшесі – Есентай өзені.
13–14 тамыз
* Әуезов және Алмалы аудандары: Қуанышбаев көшесі – Рысқұлбеков көшесі – Саин көшесі – Үлкен Алматы өзені.
14 тамыз
* Алмалы және Жетісу аудандары: Райымбек даңғылы – Бродский көшесі – Рысқұлов даңғылы – Сейфуллин даңғылы.
Аталған аумақтардың шекарасында тұратын барлық тұтынушылар үшін ыстық сумен жабдықтау толық көлемде сақталады.
Гидравликалық сынақ жылу желілерінің, олардың жабдықтарының техникалық жай-күйін тексеру және алдағы жылыту маусымына дайындық аясында құбыр желілеріндегі ақаулы учаскелерді анықтау мақсатында жүргізіледі.
Уақытша қолайсыздықтарға түсіністікпен қарауларыңызды сұраймыз!
Алматы қаласы Мәдениет басқармасы Қазақстанның барлық өңірлеріндегі ақындарды «Шабыт берген Алматы!» республикалық поэзиялық шығармалар байқауына қатысуға шақырады.
Байқаудың мақсаты – Алматының тарихи, мәдени және рухани маңызын ашу, сондай-ақ оның өткені, бүгіні мен болашағын, табиғи сұлулығын, бай мәдени мұрасын және заманауи келбетін поэзия тілімен дәріптеу.
Байқауға Қазақстан Республикасының 18 жасқа толған азаматтары тұрғылықты жеріне немесе қызмет саласына қарамастан қатыса алады.
Байқауға Алматы қаласына арналған қазақ немесе орыс тіліндегі авторлық өлеңдер қабылданады. Әр қатысушы көлемі кемінде бес шумақтан тұратын екі өлеңнен артық ұсына алмайды. Байқауға жолданатын шығармалар бұрын жарияланбаған, басқа әдеби байқауларда жүлде алмаған және толықтай автордың төл туындысы болуға тиіс.
Өтінімдер мен байқау материалдары 2026 жылы 29 шілде мен 15 тамыз аралығында электрондық форматта almatyshabyt@almatylibrary.kz электрондық поштасы арқылы қабылданады.
Өтінім қабылдау аяқталғаннан кейін шығармаларды сарапшылық комиссия мен кәсіби қазылар алқасы қарайды. Қазылар құрамына белгілі ақындар, жазушылар, әдебиеттанушылар, мәдениет және өнер қайраткерлері, қоғам және бұқаралық ақпарат құралдарының өкілдері енеді.
Байқау жұмыстары байқау тақырыбына сәйкестігі, көркемдік деңгейі, авторлық идеяның ерекшелігі, тілдің бейнелілігі мен көркемдігі, оқырманға эмоциялық әсері сынды өлшемдер бойынша бағаланады.
Байқау жеңімпаздары 2026 жылы қыркүйек айында Алматы қаласы күніне арналған мерекелік іс-шаралар аясында жарияланады.
Жүлде қоры:
* I орын – 3 000 000 теңге;
* II орын – 2 000 000 теңге;
* III орын – 1 000 000 теңге;
* бес ынталандыру сыйлығы – әрқайсысы 300 000 теңге.
Сонымен қатар жеңімпаздар мен жүлдегерлердің шығармалары «Шабыт берген Алматы» атты арнайы поэзиялық жинақта жарияланып, авторлар салтанатты марапаттау рәсіміне шақырылады.
Бұл байқау заманауи қазақстандық ақындарға шығармашылық алаң ұсынып, жаңа есімдерді танытуға, талантты авторларды қолдауға, сондай-ақ ұлттық әдебиетті дамытуға, мәдени мұраны сақтауға және Алматыны шабыт, шығармашылық пен мәдениеттің қаласы ретінде дәріптеуге үлес қосады.
Байқау ережесінің толық мәтінімен мына сілтеме арқылы танысуға болады:
https://www.gov.kz/memleket/entities/almaty-madeniet/documents/details/1048184?lang=ru
Қосымша ақпарат алу үшін: +7 747 965 3329 Әния Алпысбай.
Алматыдағы №5 қалалық клиникалық ауруханада Қазақстандағы алғашқы аудиологиялық скринингті сүйемелдеуге арналған трекинг-орталық ашылды. Сонымен қатар есту қабілеті бұзылған пациенттердің бірыңғай тіркелімін енгізу басталды. Бұл жобалар Сурдология бойынша құзыреттілік орталығының базасында жүзеге асырылуда, деп хабарлады Қоғамдық денсаулық сақтау басқармасы.
Жаңа жүйе «Мен естимін» пилоттық жобасы аясында сынақтан өтті. Жоба Алматыдағы үш перзентхана, үш алғашқы медициналық-санитарлық көмек ұйымы және екі сурдологиялық кабинетті қамтыды. Пилоттық жобаның нәтижелері жүйенің тиімділігін және оны кең көлемде енгізудің қажеттілігін растады.
«Трекинг-орталықтың ашылуымен біз Алматыдағы барлық перзентханалар мен алғашқы медициналық-санитарлық көмек ұйымдарын кезең-кезеңімен осы жүйеге қосамыз. Бұл есту қабілетінің бұзылуын ерте анықтау және балаларды үздіксіз сүйемелдеудің бірыңғай бағытын қалыптастыруға мүмкіндік береді», – деді трекинг-орталықтың ашылуына қатысқан Қоғамдық денсаулық сақтау басқармасының басшысы Марат Пашимов.
«Мен естимін» жобасы баланы аудиологиялық скринингтен бастап, диагноз қою, емдеу, есту аппараттарымен қамтамасыз ету және оңалту кезеңдеріне дейін толық сүйемелдеуді көздейді. Трекинг-орталық тексеру нәтижелерін нақты уақыт режимінде алып, «жасыл дәліз» қағидаты бойынша қосымша диагностика ұйымдастырады және анықталған есту бұзылысы бар балаларды бақылауда ұстайды.
Жүйенің тиімділігі іс жүзінде дәлелденді. 2026 жылдың басынан бері 11 баланың толық есту қабілетінен айырылғаны дер кезінде анықталды. Олардың барлығына кохлеарлық имплантация жасалып, қазіргі уақытта оңалту курсынан өтуде.
Жоба кеңейтілгеннен кейін жыл сайын 90 мыңнан астам баланы аудиологиялық мониторингпен қамту жоспарланып отыр. Бұл ауыр дәрежедегі есту бұзылыстары мен толық саңыраулықты баланың өмірінің алғашқы жылында-ақ анықтап, емдеуді уақытылы бастауға мүмкіндік береді.
Бірыңғай тіркелім есту қабілеті бұзылған балалар мен ересектер туралы мәліметтерді біріктіреді. Жүйе пациенттерді диагностикадан бастап емдеу және оңалтуға дейін үздіксіз сүйемелдеуді қамтамасыз етіп, мамандандырылған көмектің тиімділігін арттыруға ықпал етеді.
Жыл басынан бері №5 қалалық клиникалық аурухананың Сурдология бойынша құзыреттілік орталығының мамандары МӘМС аясында есту қабілетін жақсартуға бағытталған 200-ден астам ота жасады. Сонымен қатар 400-ден астам пациентке есту аппаратын алуға жолдама берілді.
Бүгінде орталық Қазақстанның барлық өңірінен келген пациенттерге мамандандырылған көмек көрсетеді. Олардың 58%-ы Алматының тұрғындары.
Алматының Әуезов ауданында қала әкімі Дархан Сатыбалдының тапсырмасы аясында аулаларды күтіп ұстау және жөндеу жұмыстары жалғасып отыр. Бұл туралы Әуезов ауданы әкімдігінің өкілдері айтты.
Ағымдағы жөндеу аясында 30 футбол және баскетбол алаңының қоршаулары қалпына келтірілді. Сонымен қатар, 70 ауланың балалар және спорт алаңдарындағы тартан жабыны жаңартылып, қалпына келтірілді.
Тағы 4 аулада қосымша шағын сәулет нысандары орнатылды.
Аудан әкімдігінің мәліметінше, 971 ауланы санитарлық тазалау және ұсақ жөндеу жұмыстары күн сайын жүргізіледі. Бұл жұмыстарға 7 мердігер ұйым, 440 жол жұмысшысы және 46 бірлік арнайы техника жұмылдырылған.
Алматы қаласының Коммуналдық инфрақұрылым және тұрғын үй инспекциясы басқармасы «Алматы жастары» бағдарламасы бойынша өтінім қарауды қорытындылады. Өтінімдер 1-15 маусым аралығында kezekte.kz порталы арқылы қабылданып, бағдарламаға қатысу үшін барлығы 5 363 өтінім түсті.
Құжаттарды қарау барысында кейбір қатысушылардың өтінім беру кезінде қызмет саласын қате көрсеткені анықталды. Бұл техникалық сипаттағы қателік болғандықтан, олардың бағдарламаға қатысуына кедергі келтірген жоқ.
Құжаттарды тексеру нәтижесінде 3 968 өтінім мақұлданды. Биыл бағдарлама аясында кемінде 1 650 тұрғын үй несиесін беру жоспарланған. Дәл осы мөлшердегі қатысушылар төлем қабілеттілігін растау үшін «Отбасы банк» АҚ-на жолдама алады. Кезектің алдын алу мақсатында жолдамалар кезең-кезеңімен апта сайын 550 қатысушыға беріледі.
Төлем қабілеттілігі расталғаннан кейін қатысушыларға 45 күнтізбелік күн ішінде бастапқы немесе қайталама тұрғын үй нарығынан баспана таңдап, 20 млн теңгеге дейінгі тұрғын үй несиесін рәсімдеуге мүмкіндік беріледі.
Егер кейбір қатысушылар төлем қабілеттілігін растай алмаса немесе белгіленген мерзімде тұрғын үй таңдап үлгермесе, жолдама беру кезегі оң қорытынды алған келесі үміткерлерге өтеді. Бұл бағдарламаға бөлінген қаражаттың толық әрі тиімді игерілуін қамтамасыз етеді.
Құжаттарды қарау нәтижесінде 1 395 өтініш берушінің құжаттары бағдарлама талаптарына сәйкес келмеді. Бұған олардың жеке меншігінде тұрғын үйінің болуы, соңғы бес жыл ішінде тұрғын үйді иеліктен шығаруы немесе соңғы алты айда міндетті зейнетақы жарналарының аударылмауы себеп болды.
Өтінімі мақұлданған және өтінімі мақұлданбаған үміткерлердің тізімі kezekte.kz порталындағы ALMATY JASTARY сервисінің «Тұрғын үй қызметтері» бөлімінде жарияланады.
Самокат, скейтборд және BMX тебуге арналған алаңдармен жабдықталған жаңа FLOW PARK қоғамдық кеңістігінде тәулік бойы жұмыс істейтін модульдік алғашқы медициналық көмек көрсету пункті орнатылды. Ол жедел медициналық жәрдем станциясымен шұғыл байланыс жүйесімен жабдықталған. Бұл туралы Алматы қаласының Цифрландыру басқармасының өкілдері айтты.
Алматыдағы алғашқы телемедициналық алғашқы көмек көрсету модулінің іске қосылуы – қаланың жедел медициналық көмек жүйесін дамытудағы және тұрғындар мен қала қонақтарының қауіпсіздігін арттырудағы жаңа кезең.
Өзін жайсыз сезінген немесе жарақат алған жағдайда тұрғын SOS батырмасын басып, жедел медициналық жәрдем диспетчерімен бірден байланыса алады. Медицина қызметкері модульді қашықтан ашып, аудио және бейнебайланыс арқылы адамның жағдайын бағалайды әрі жедел жәрдем бригадасы келгенге дейін қажетті нұсқау береді.
Өлшемі 2×2,5 метр болатын пункттің ішінде дефибриллятор, жарақаттарды алғашқы өңдеуге арналған құралдар, жедел коронарлық синдром кезінде көмек көрсетуге арналған медициналық жиынтық, брезент көрпе және тот баспайтын болаттан жасалған медициналық кушетка орналастырылған.
Модуль сондай-ақ үздіксіз интернетпен, 360 градус шолу мүмкіндігі бар сыртқы бейнебақылау камерасымен, ішкі камералармен, ақпараттық дисплеймен және қашықтан басқарылатын телемедициналық кешенмен жабдықталған. Диспетчер нақты уақыт режимінде жабдықтар мен алғашқы көмек көрсету құралдарын пайдалану тәртібін түсіндіріп отыра алады.
Модульдің құрылымы түрлі ауа райы жағдайына төзімділігі жоғары HPL-панельдер мен тот баспайтын болаттан жасалған.
Алматыда қаланың жасыл қорын күтіп ұстау жұмыстары жалғасуда. Бұл туралы қалалық Коммуналдық инфрақұрылымды дамыту және тұрғын үй инспекциясы басқармасының өкілдері айтты.
Жыл басынан бері «Алматы Тазалық» МКК мамандары санитарлық мақсатта 32,3 мыңнан астам ағаш кесіп, жылдық жоспардың 46 пайызын орындады.
Алматы әкімі Дархан Сатыбалдының тапсырмасына сәйкес, санитарлық мақсатта кесу жұмыстарының көлемі екі есеге артып, жалпы саны 140 мың ағашқа дейін жеткізіледі.
Қазіргі уақытта санитарлық мақсатта кесу жұмыстары қаланың негізгі магистральдық көшелері мен көлік дәліздерінде қолға алынған. Оған 32 мамандандырылған бригада, 160 қызметкер және 34 арнайы техника, оның ішінде 18 автогидрокөтергіш жұмылдырылған.
Сонымен қатар жыл басынан бері қаланың барлық сегіз ауданында 8,7 мың ағашқа қалыптап кесу жұмысы жүргізілді. Бұл шаралар жасыл желектердің саулығын сақтауға, қаланың көркін жақсартуға және жол қозғалысының қауіпсіздігін арттыруға бағытталған.
Алматының Наурызбай ауданында бірнеше білім беру нысанының құрылысы аяқталуға жақын. Бұл туралы аудан әкімдігінің өкілдері айтты.
15 мектеп-интернатының құрылыс жұмыстары 99%-ға аяқталды. Негізгі құрылыс-монтаж жұмыстары толық аяқталып, қазіргі уақытта іске қосу-баптау жұмыстары қолға алынған.
№174 мектепке салынған қосымша ғимараттың құрылысы 100%-ға аяқталды. Нысан қалалық Білім басқармасының иелігіне беріліп жатыр.
Сонымен қатар Нұрлы Дала және Құрамыс шағынаудандарындағы балабақшалар пайдалануға берілмек. Қазіргі уақытта ғимараттарды қажетті жабдықтармен жарақтандыру жұмыстары жүргізілуде. Ал Қалқаман шағынауданындағы балабақша 99%-ға дайын. Бүгінде сыртқы инженерлік желілерді жүргізу және аумақты көріктендіру жұмыстары аяқталып келеді.