Алматы қаласының Жұмыспен қамту және әлеуметтік бағдарламалар басқармасы мегаполис тұрғындарын Оңтүстік Корея Республикасында заңсыз еңбек мәртебесінде жүрген Қазақстан азаматтарына арналған ерікті түрде елден шығу мүмкіндігі туралы хабардар етеді

Қазақстан Республикасының Еңбек және халықты әлеуметтік қорғау министрлігінің мәліметінше, Оңтүстік Корея Республикасында заңсыз жұмыс істеп жүрген Қазақстан азаматтары, оның ішінде Алматы қаласының тұрғындары, 2026 жылдың ақпан айының соңына дейін айыппұл салынбай және қайта кіруге тыйымсыз елден ерікті түрде шыға алады.

Бұған дейін хабарланғандай, тиісті уағдаластықтар Қазақстан Республикасының Еңбек және халықты әлеуметтік қорғау министрлігі мен Оңтүстік Корея Республикасының Әділет министрлігі арасында 2025 жылы өткен келіссөздер барысында қол жеткізілген. Аталған шаралар заңсыз көші-қонды азайтуға және шетелде жүрген Қазақстан азаматтарының құқықтарын қорғауға бағытталған.

Ерікті түрде елден шығу бағдарламасы көші-қон мәртебесін реттеуге дайын азаматтар үшін құқықтық салдарды жеңілдетуге мүмкіндік береді. Алайда бұл бағдарлама қылмыстық құқық бұзушылық жасаған тұлғаларға, мәжбүрлеп елден шығарылуға жататын адамдарға, сондай-ақ 2025 жылғы 1 желтоқсаннан кейін заңсыз мәртебеге түскен шетел азаматтарына қолданылмайды.

Алматы қаласының Жұмыспен қамту және әлеуметтік бағдарламалар басқармасы алматылықтарға шетелде еңбек қызметін тек заңды негізде жүзеге асыруды ұсынып, заңсыз көші-қон, елден шығарылу, айыппұл салу, құқықтардың шектелуі және еңбек қанауы сияқты тәуекелдерден сақтануға шақырады.

Алматы қаласының тұрғындарына жұмыспен қамтудың тек ресми әрі тексерілген арналары, оның ішінде лицензияланған жеке жұмыспен қамту агенттіктері, мемлекеттік бағдарламалар және шетелдік жұмыс берушілердің ресми ұсыныстары арқылы жұмысқа орналасу ұсынылады.

Алматы қаласының Жұмыспен қамту және әлеуметтік бағдарламалар басқармасы Қазақстан Республикасынан тыс жерлерде еңбек қызметін жүзеге асырып жүрген азаматтардың құқықтарын қорғау және оларды ақпараттандыру бағытындағы жұмысты жалғастырады.