Алматыда секциялар мен үйірмелерді қаржыландыруға 3,2 млрд теңге бөлінді

Алматының жергілікті атқарушы органдарының алдына балаларды бұқаралық спорт түрлеріне белсенді тарту, сондай-ақ тегін спорт секциялары мен үйірмелерін ашу міндеті қойылды. Мемлекет басшысы тапсырмасының қалай жүзеге асырылып жатқаны туралы Өңірлік коммуникациялар қызметінің брифингінде Алматы қаласы Спорт басқармасының басшысы Рүстем Байсеитов айтып берді, деп хабарлайды Almaty.tv тілшісі қалалық әкімдіктің баспасөз қызметіне сілтеме жасап.

Ол ел Президенті Қасым-Жомарт Тоқаевтың 2021 жылғы 1 мамырдан бастап мемлекеттік тапсырыс аясында спорт секциялары мен шығармашылық үйірмелерді жан басына нормативтік қаржыландыру тетігі енгізілгенін еске салды.

Бағдарлама 4 жастан 17 жасқа дейінгі балалар мен жасөспірімдерге, оның ішінде ерекше қажеттіліктері бар балаларға 71 спорт түрінен спорт секцияларына тегін қатысуға мүмкіндік береді.

Рүстем Байсеитовтың айтуынша, өткен жылы аталған жобаны жүзеге асыруға бюджеттен 1,2 млрд теңге бөлінді, 44 000 бала мен жасөспірім секциялар мен үйірмелерге тегін қатыса алды. Ең көп сұранысқа ие футбол, шахмат, таэквондо, дзюдо, жүзу болды.

«Биыл осы мақсаттарға 3,2 млрд теңге бағытталды. Енді балалар спортпен және шығармашылықпен айналыса алады. Бұл ата-аналар үшін тамаша мүмкіндік, олар бөлімді төлеуге ақша жұмсамайды. Біздің мәліметтеріміз бойынша, бір балаға спорт секциясына барудың орташа құны айына 20 500 теңгені құрайды», - деді қалалық Спорт басқармасының басшысы.

Балалар үйірмелері мен спорт секцияларын жан басына қаржыландыруды іске қосу процесін автоматтандыру мақсатында Artsport.edu.kz ақпараттық жүйесі әзірленді. Бүгінде, ведомствоның мәліметінше, жеткізушілерден 594 өтінім мақұлданды. Мемлекеттік спорттық тапсырысты жан басына нормативтік қаржыландыру аясында жаттығуға спорттың 37 түрі бойынша 44 000 бала кірісті.

Рүстем Байсеитов алматылықтарды осы мүмкіндікті пайдаланып, балаларды секцияға беруге шақырды.