Алматылық оқушылар Қазақстанды әлемдік аренада танытты
Алматының жас инженерлері АҚШ-тың Хьюстон қаласында өткен FIRST Championship 2025 халықаралық чемпионатында тарихи жетістіктерге жетті.
2025 жылғы 16–19 сәуір аралығында АҚШ-тың Хьюстон қаласында білім беру робототехникасы мен инженерия саласындағы ең беделді халықаралық турнирлердің бірі — FIRST Championship 2025 өтті. Биылғы жылы бұл сайысқа 110 елден 1000-нан астам команда және 50 000 қатысушы жиналды.
Қазақстан атынан Алматы қаласының үш командасы лайықты түрде өнер көрсетті:
- Sana Team — «Білім-инновация» мамандандырылған мектеп-лицей-интернаты;
- PID — Химия-биология бағытындағы Назарбаев Зияткерлік мектебі;
- Cristabol — Физика-математика бағытындағы Назарбаев Зияткерлік мектебі.
Командалар жоғары дайындық деңгейін, инженерлік ойлауды және командалық жұмысты танытып, Қазақстан оқушыларының чемпионат тарихындағы ең үздік нәтижелерінің бірін көрсетті.
Sana Team роботтар ойынында өз санатындағы 258 команданың ішінен Үздік-20 қатарына еніп, тамаша нәтиже көрсетті. Жасөспірімдер сенімді стратегияны, инженерлік тапқырлықты және үйлесімділікті паш етті. Бұл жетістік — жүйелі дайындықтың, ұжымдық ұйымшылдықтың және терең техникалық білімнің жемісі.
«Біз бір үлкен нәрсенің бөлігі болғандай сезіндік. Әртүрлі елдерден келген командалармен идея алмасу бізді жаңа жобаларға шабыттандырды және өз күшімізге сенуге көмектесті. FIRST — бұл жай ғана жарыс емес, бұл — өмір мектебі», — деп бөлісті Sana Team командасының мүшесі, 11-сынып оқушысы Смайл Дарын.
Мұндай беделді халықаралық чемпионатқа қатысу Sana Team үшін өзін әлемдік деңгейде танытумен қатар, әртүрлі елдерден келген командалармен қарым-қатынас, ынтымақтастық және білім алмасу бойынша құнды тәжірибе болды.
Cristabol командасы да үлкен жетістікке жетіп, чемпионаттың ең басты марапаттарының бірі — техникалық және техникалық емес жетістіктер арасындағы тепе-теңдігі үшін берілетін Inspire Award жүлдесінің қола иегері атанды.
PID командасы Қазақстан тарихында тұңғыш рет 12–18 жас санаты бойынша финалға өтіп, нағыз серпіліс жасады. Олар бірден екі беделді марапатқа ие болды:
- Motivate Award Winner — өз қауымдастығында FIRST идеяларын насихаттап, шабыттандырғаны үшін;
- Division Finalist Award — өз дивизионында финалға шыққаны үшін.
Алматылық оқушылардың FIRST Championship 2025 турниріне қатысуы инженерлік білім беруді дамыту және Қазақстанды ғылым мен технология саласындағы әлемдік аренада ілгерілету жолындағы маңызды қадам болды. Бұл жетістіктер қазақстандық жастардың зор әлеуетін және STEM саласындағы білім беру бастамаларының тиімділігін айқын дәлелдейді.