Қазақстан, Сингапур, Швейцария және АҚШ сарапшылары болашақ мектебін талқылады
2026 жылғы 20 ақпанда М. Маметова атындағы №28 мектеп-лицейі базасында Алматы қаласы Білім басқармасының Әдістемелік орталығы (ҚББЖТҒӘО) ұйымдастырған халықаралық онлайн-семинар өтті. Кездесудің тақырыбы — қазіргі мектептің инновациялық тәжірибелері: STEM және жасанды интеллекттен бастап инклюзия мен зерттеу жұмыстарына дейінгі бағыттар.
Семинарға кәсіби трансформацияға дайын мектеп басшылары, әдіскерлер мен пән мұғалімдері — барлығы 177 қатысушы жиналды. Іс-шараның басты мақсатына қол жеткізілді: әлемнің әр түкпірінен келген сарапшылар теориямен ғана шектелмей, халықаралық тағылымдамалар мен заманауи технологиялардың қазақстандық сыныптардағы нақты тәжірибеге қалай айналып жатқанын көрсетті.
Қатысушылар жаһандық диалог атмосферасына енді. Наньян технологиялық университетінің (Сингапур) өкілі Чен Чунг-Ан мектепте жасанды интеллектіні қолданудың этикалық мәселелерін көтерсе, оның студенті Дінмұхамед Омар оқу орнының мектеп қабырғасынан бастап идеялы әрі тәжірибеге бағытталған көшбасшыларды қалай тәрбиелей алатыны жөніндегі шабыттандыратын үлгіні таныстырды.
Жасанды интеллектіні «ақылды енгізу» бойынша еуропалық көзқарасты Swiss Innovators Club президенті Джордж Махвиладзе ұсынды. АҚШ-тан келген Меган Ван Фоссан (Питтсбург университеті және Карнеги-Меллон университеті) әрбір бала үшін білімді қолжетімді ететін оқытудың әмбебап дизайны қағидаттарын жан-жақты түсіндірді.
Қазақстандық сарапшылардың қатысуы да ерекше мазмұнды болды. Білім беру технологиялары саласының көшбасшысы Нұрлан Киясов цифрландыру дәуірінде ұрпақты жоғалтып алмаудың маңыздылығына тоқталды. Qalamedutech негізін қалаушы Аида Абилякимова алдағы PISA 2029 зерттеуі аясында жасанды интеллект саласындағы сауаттылық мәселесін көтерді.
ҚББЖТҒӘО әдіскерлері — ғылыми-әдістемелік жұмыс бөлімінің жетекшісі Назима Жақыпова және жаратылыстану-математика бағытындағы химия пәні әдіскері Бибігүл Әлімбекова цифрлық технологиялар арқылы зерттеушілік қабілеттерді дамыту және жаратылыстану сабақтарында функционалдық сауаттылықты қалыптастыру бойынша практикалық тәжірибелерімен бөлісті. Қабылдаушы тарап — №28 мектеп-лицейінің директоры Айсулу Медетбекова өз мектебінде жасанды интеллект пен инклюзивтік тәсілдерді интеграциялаудың нақты тәжірибесін таныстырды.
Семинардың негізгі тақырыптары:
STEM: Құрғақ теориядан инженерлік ойлау мен нақты жобаларға көшу жолдары.
Жасанды интеллект: Оқытуды дербестендіру және сыныпта ЖИ қолданудың этикалық нормалары.
Инклюзия: Технологиялар кедергілерді жоятын бейімделген орта қалыптастыру.
Басқару: Мектеп әкімшілігінің пәнаралық мұғалімдер командаларын шабыттандырып, инновацияларды күйзеліссіз енгізу жолдары.
ҚББЖТҒӘО директорының міндетін атқарушы Ардақ Смағұлова халықаралық қонақтарға алғыс білдіріп, мұндай кездесулер әлемдік тәжірибе мен Алматы білім беру жүйесі арасындағы алтын көпір екенін атап өтті.
Бұл семинар Алматы мектептері уақытпен қатар қадам басып қана қоймай, болашақтың білім беру күн тәртібін қалыптастырып отырғанын тағы бір мәрте дәлелдеді. Үздік әлемдік тәжірибелер балалармен күнделікті жұмыста тиімді түрде интеграцияланып келеді.