Алматы мектептерінің басшылары ұжымдағы үйлесімділікті арттыру тәсілдерін меңгерді

21 қараша күні Алматы қаласы №15 гимназия базасында қалалық Білім басқармасы мен Білім берудегі жаңа технологиялардың ғылыми-әдістемелік орталығы (БЖТҚҒӘО) бірлесіп ұйымдастырған әдістемелік семинар-практикум өтті. Бұл іс-шара жас директорларға арналған «Менторлық мектебі» бағдарламасының маңызды кезеңдерінің бірі болды.
БЖТҚҒӘО директорының міндетін атқарушы Ардақ Смағұлованың айтуынша, семинар тақырыбы жас басшылар үшін өзекті, себебі қазіргі білім беру ұйымының табыстылығы директордың келіспеушіліктерді конструктивті түрде басқара алу қабілетіне тікелей байланысты.
Іс-шара барысында қаланың тәжірибелі мектеп директорлары сөз сөйлеп, қақтығыстарды деструктивті фактордан даму мен өсуге ынталандыратын мүмкіндікке айналдыру стратегияларымен бөлісті. Семинарда қарастырылған негізгі мәселелердің қатарында: қақтығыстардың табиғаты мен түрлері (мұғалім–мұғалім, әкімшілік–ата-ана), тиімді медиация әдістері, сондай-ақ басшының эмоционалды интеллектісінің рөлі болды.
«Жас басшылар орасан зор қысымға тап болады, ал қақтығыстар кейде үлкен тосқауылға айналуы мүмкін. Біздің міндетіміз – менторлар ретінде қақтығыстың тығырық емес, жақсартуға бағытталған мүмкіндік екенін көрсету. Біз оларды келіспеушіліктерден қашпай, оларды командалық рухты нығайтуға қолдануға үйретеміз», – деді №90 мектеп-лицей директоры Бұлбүл Оспанбек.
Семинар бағдарламасына өзара әрекеттесу үдерістерін терең түсінуге бағытталған бірегей практикалық сессиялар енгізілді:
Психолог Меруерт Аязбаева жүргізген «Тыңдай білу және ести білу» арт-терапия сессиясы белсенді және эмпатиялық тыңдау дағдыларын (сурет салу, мүсіндеу арқылы) дамытуға арналды. Бұл қатысушыларға ақпаратты қабылдауға кедергі келтіретін вербалды емес сигналдар мен ішкі «фильтрлерді» түсінуге көмектесті.
«Арт-терапия біздің ішкі диалогымызды және өзгенің сөзін қабылдайтын ‘фильтрлерімізді’ көруге мүмкіндік береді. Бұл – өзін-өзі тануға және қарым-қатынастың сапасын арттыруға апаратын қауіпсіз жол», – деп атап өтті Меруерт Серіковна.
Фасилитатор Жанна Хисамиддинованың, №49 мектеп директоры және психологиялық қызмет маманы Айгерім Ахметованың жетекшілігімен қатысушылар шағын топтарда келіспеушіліктерді шешудің ортақ стратегиялары мен нақты қадамдарын әзірлеп, бірлескен іс-қимыл жоспарын жасады.

Семинар қорытындысында жас мектеп директорлары қақтығыстарды алдын ала анықтап, олардың алдын алу дағдыларын меңгерді. Дағдарыс жағдайындағы нақты әрекет алгоритмін алып, өз мектептерінде корпоративтік мәдениетті нығайтуға арналған жеке жоспарларын әзірледі. Сондай-ақ тәжірибелі ментор әріптестерімен кәсіби байланыс желісін қалыптастырды.
Қалалық әдістемелік семинар-практикум Алматы Білім басқармасының мектеп басшыларын ұжымды басқарудың заманауи, тиімді құралдарымен қамтамасыз етуге ұмтылысын тағы да дәлелдеді.