Алматы қаласының №2 балалар ауруханасында өткен халықаралық шеберлік сабағы: жамбас-сан буынының күрделі патологияларын емдеудің заманауи тәсілдері
2025 жылғы 20–21 тамызда Алматы қаласындағы №2 Балалар қалалық клиникалық ауруханасының базасында «Балалардағы жамбас-сан буынының туа біткен және жүре пайда болған даму ақаулары және оларды хирургиялық түзету әдістері» тақырыбында халықаралық шеберлік сабағы өтті.
Шеберлік сабағына Ресей Федерациясының жетекші маманы — Н.И. Пирогов атындағы Санкт-Петербург мемлекеттік университетінің Жоғары медициналық технологиялар клиникасы №3 травматология бөлімшесінің травматолог-ортопеді, медицина ғылымдарының кандидаты Павел Игоревич Бортулёв қатысты.
Сарапшының келуі мен шеберлік сабағын өткізу «Ерікті Мейірім Қоғамы» қоғамдық қорының қолдауымен ұйымдастырылды. Қор көптеген жылдар бойы балалар денсаулығын сақтау ісін дамытуға, медицина қызметкерлерінің біліктілігін арттыруға және Қазақстандағы балаларды емдеудің заманауи әдістерін енгізуге қолдау көрсетіп келеді.
Іс-шараның негізгі мақсаты – мамандардың кәсіби біліктілігін арттыру, халықаралық тәжірибе алмасу және балалардағы жамбас-сан буынының күрделі аурулары мен деформацияларын емдеуде заманауи технологияларды енгізу болды.
Жамбас-сан буыны тірек-қимыл жүйесіндегі ең күрделі анатомиялық құрылымдардың бірі болып табылады. Әрбір хирургиялық араласу жеке тәсілді, жоғары дәлдікті және патологияның ерекшеліктерін терең түсінуді талап етеді.
Шеберлік сабағы аясында №2 БҚКА дәрігерлері ресейлік маманмен бірлесіп күрделілігі әртүрлі үш жоғары технологиялық операция жасады.
Бірінші клиникалық жағдайда жамбас-сан буынына өте жақын орналасқан патологиялық түзіліске ошақішілік резекция жүргізілді. Хирургтер патологиялық ошақты алып тастап, сүйек ақауын қалпына келтіріп, буын қызметін сақтау үшін ұршық ойығының анатомиялық тұтастығын қайта қалыптастырды.
Екінші пациент – дистрофиялық кокса-варасы және сан сүйегінің проксимальді бөлігінің айқын көпжазықтық деформациясы бар бала. Операция барысында жамбас-сан буынының анатомиясы кешенді түрде түзетіліп, буын тұрақтылығы, сан сүйегі басының дұрыс орналасуы қалпына келтірілді және асқынулардың алдын алуға бағытталған шаралар жүзеге асырылды.
Үшінші клиникалық жағдай ауыр бассүйек-ми жарақатынан кейін жамбас-сан буыны аймағында гетеротопиялық оссификация дамыған балаға қатысты болды. Мамандар қан тамырлары мен жүйке құрылымдарын сақтай отырып, күрделі сүйектік түзілістерді алып тастады. Бұл буын қозғалысын қалпына келтіруге және баланың өмір сапасын едәуір жақсартуға мүмкіндік береді.
Осындай халықаралық шеберлік сабақтарын өткізу балалар ортопедиясы мен травматологиясын дамытуға, отандық мамандардың тәжірибелік дағдыларын жетілдіруге және Қазақстанның балалар денсаулығын сақтау жүйесіне заманауи хирургиялық әдістерді енгізуге ықпал етеді.
Алматы қаласының №2 Балалар қалалық клиникалық ауруханасы халықаралық кәсіби ынтымақтастықты белсенді түрде дамытуды жалғастырып, балаларға әлемдік стандарттарға сай жоғары технологиялық әрі сапалы медициналық көмек көрсету мүмкіндіктерін кеңейтуде.