Алматыда балаларға арналған алғашқы мамандандырылған паллиативтік бөлімше ашылды
Алматыда 15 төсекке арналған алғашқы мамандандырылған балаларға арналған паллиативтік бөлімше жұмысын бастады. Ол №2 Балалар қалалық клиникалық ауруханасының базасында құрылып, қаладағы балаларға паллиативтік көмек көрсетуге маманданған алғашқы бөлімше болды.
Денсаулық сақтау министрлігінің хабарлауынша, бөлімше ұзақ уақыт бойы медициналық бақылауды және ерекше күтімді қажет ететін ауыр созылмалы және жазылмайтын аурулары бар балаларға арналған. Мұнда тәулік бойы бақылау, ауырсынуды басу, ауыр симптомдарды бақылау және бейінді мамандардың консультациялары қамтамасыз етіледі.
Көмекті мультидисциплинарлық команда көрсетеді. Оның құрамына дәрігер-анестезиолог-реаниматологтар, онкогематологтар, педиатрлар, паллиативтік көмекті үйлестіруші, мейіргерлер және басқа да мамандар кіреді. Әр бала үшін оның жағдайын ескере отырып, жеке көмек көрсету жоспары әзірленеді.
Бөлімше жұмысының маңызды бағыты – ата-аналарды қолдау және оларды балаға күтім жасауға үйрету. Отбасыларға қажетті ұсынымдар беріліп, психологиялық көмек көрсетіледі. Бұл баланы ауруханадан шыққаннан кейін де сапалы күтіммен қамтамасыз етуге мүмкіндік береді.
Алматы қаласының Қоғамдық денсаулық сақтау басқармасының басшысы Марат Пашимов: «Мамандандырылған балаларға арналған паллиативтік бөлімшенің ашылуы – Алматыда осы қызметті дамытудың маңызды қадамы. Біздің міндетіміз – ауыр дертке шалдыққан балалардың қажетті медициналық көмекке, ауырсыну мен симптомдарды бақылауға қолжетімділігін қамтамасыз ету, ал ата-аналарға кәсіби қолдау мен сүйемелдеу көрсету», – деп атап өтті.
Алматы қаласында паллиативтік мәртебесі белгіленген 300-ге жуық бала бар. Жалпы, Қазақстан бойынша балаларға паллиативтік көмек көрсету мүмкіндіктері кезең-кезеңімен кеңейтілуде. 2026 жылғы 1 шілдедегі жағдай бойынша елде 142 мамандандырылған паллиативтік төсек-орын жұмыс істейді. Қызметті дамыту кешенді медициналық көмектің қолжетімділігін арттыруға және балалар мен олардың отбасыларын қолдау үшін қажетті жағдайлар жасауға бағытталған.
Алғашқы мамандандырылған балаларға арналған паллиативтік бөлімшенің ашылуы балалар мен олардың отбасыларының кешенді көмекке қолжетімділігін кеңейтіп, Алматыда паллиативтік көмекке мұқтаж пациенттерді медициналық сүйемелдеудің жеке бағытын қалыптастыруға мүмкіндік береді.