Алматыда Қазақстандағы мектеп медицинасын жаңғырту мәселелері талқыланды

Бүгін Алматы Орталық қалалық клиникалық ауруханасында Қоғамдық денсаулық сақтау басқармасының ұйымдастыруымен Қазақстан Республикасындағы мектеп медицинасын жаңғырту мәселелеріне арналған республикалық семинар-кеңес өтті.

Іс-шараға Республикалық медициналық-санитариялық алғашқы көмек орталығының дәрігер-сарапшысы Тургангуль Бишораева, Денсаулық сақтауды дамытудың ұлттық ғылыми орталығы Алматы қалалық филиалының бас маманы Айгерим Мекенова, сондай-ақ медициналық ұйымдар директорларының балаларға медициналық көмек көрсету және босандыру қызметі жөніндегі орынбасарлары, мектепке дейінгі және мектеп медицинасы бөлімшелерінің меңгерушілері, мектеп медицинасының үйлестірушілері, профилактикалық медициналық қарап-тексерулерді жүргізуге қатысатын медицина қызметкерлері, сондай-ақ денсаулық сақтау және білім беру басқармалары тарапынан «Салауатты мектеп» жобасының үйлестірушілері қатысты.

Семинар барысында қатысушыларға 2026 жылғы 1 қыркүйектен бастап қолданысқа енгізілетін балаларға профилактикалық медициналық қарап-тексерулерді ұйымдастырудың жаңа стандартының негізгі ережелері түсіндірілді. Сонымен қатар «Салауатты мектеп» жобасының мақсаты мен оны іске асыру тетіктері таныстырылды.

Семинарда профилактикалық медициналық қарап-тексерулерді цифрландыру, балалар арасындағы ауруларды ерте кезеңде анықтау жүйесін жетілдіру, диагностиканың заманауи тәсілдерін енгізу, сондай-ақ денсаулық сақтау және білім беру ұйымдары арасындағы өзара іс-қимылдың тиімдігін арттыру мәселелеріне ерекше назар аударылды.