Өмірге берілген мүмкіндік: Алматыда сирек асқынуы бар жүкті әйел құтқарылды

Алматы қаласындағы №7 қалалық клиникалық аурухана дәрігерлері ана мен болашақ сәбидің өмірін сақтап қалуға мүмкіндік берген күрделі ота жасады.

25 жастағы пациент жүктіліктің 19-аптасында іштің қатты, басылмайтын ауыруымен жедел жәрдем арқылы стационарға жеткізілді. Тексеру барысында жатырдағы көптеген миоматозды түйіндердің аясында сирек әрі қауіпті асқыну — миоматозды түйіннің некрозы анықталды.

Пациенттің айтуынша, жатыр миомасы алғаш рет 2024 жылы анықталып, әйел тіркелген емханасында диспансерлік бақылауда болған. Түйіндердің көлемі шағын, клиникалық тұрғыдан маңызды емес және үдемелі өсу белгілері болмаған. Алайда 2025 жылы жүктілік басталғаннан кейін гормоналдық өзгерістерге байланысты миоматозды түйіндердің тез ұлғаюы байқалған.

Алғашында дәрігерлер консервативті ем тактикасын таңдады: екі тәулік бойы ем жүргізіліп, науқастың жағдайы бақылауда болды. Дегенмен ауырсыну басылмады, ал қайта жасалған ультрадыбыстық зерттеу жағдайдың нашарлағанын көрсетті.

Дәрігерлер алдында күрделі таңдау тұрды: күту тактикасын жалғастыру немесе ана мен ұрық үшін жоғары қауіп төндіретін операция жасау.

«Жүктілік кезінде жатырға жасалатын операциялар әрдайым жоғары қауіппен байланысты. Қан кету, асқынулар, тіпті жүктілікті жоғалту қаупі бар. Бірақ кейбір жағдайларда бұл — науқастың өмірін сақтап қалудың жалғыз жолы», — деді акушер-гинеколог, хирург Жібек Жаналиева.

Клиникалық жағдайды ескере отырып, мультидисциплинарлық консилиум шешімімен операция жасау туралы шешім қабылданды. Гинекология бөлімшесінің меңгерушісі С.М. Оспанғалиеваның жетекшілігімен емдеу тактикасы нақтыланды.

Хирургтар консервативті миомэктомия жасады — некрозға ұшыраған түйін алынып, жатыр мен жүктілік барынша сақталды.

Ота жоғары дәлдікті талап етті: жүктілік кезінде жатырдың қанмен қамтамасыз етілуі күшейеді, сондықтан кез келген қателік ауыр салдарға әкелуі мүмкін. Сонымен қатар анестезиологтың жұмысы да аса маңызды болды — ол ана мен ұрықтың жағдайын қатар ескерді.

Жаналиева Ж.Р., Абдужабарова Ш.А., Дулатова А.К. бастаған акушер-гинекологтар және анестезиолог Туфиманов Е.Н. секілді мамандардың үйлесімді жұмысының арқасында операция сәтті өтті.

Отадан кейінгі кезеңде науқастың және ұрықтың жағдайы мұқият бақылауда болды. Бірнеше күннен кейін қауіп сейіліп, пациент қанағаттанарлық жағдайда, жүктілігі сақталған күйде үйіне шығарылды.

Кейіннен жүктілік сәтті өтіп, әйел уақытында аман-есен босанды.

Мамандардың айтуынша, мұндай жағдайлар сирек кездескенімен, жедел әрі кәсіби шешім қабылдауды талап етеді. Жүктілік кезіндегі миоматозды түйін некрозы — тек қатты ауырсынумен ғана емес, ана өміріне нақты қауіп төндіретін жағдай.

Бұл оқиға дәрігерлердің кәсібилігі, тәжірибесі және командалық жұмысы бір мезетте екі өмірді сақтап қала алатынын тағы бір дәлелдеді.