Алматының №2 Балалар қалалық клиникалық ауруханасында қол, мойын және кеуде тұсы қатты күйіп қалып, соның ауыр зардабын тартып келе жатқан балаға жасалған аса күрделі бірегей ота сәтімен аяқталды.
Операция туа біткен және жүре пайда болған патологиясы бар балаларға арналған реконструктивті хирургия бойынша халықаралық «шеберлік сабағы» шеңберінде жүзеге асырылды. Оны Samruk Kazyna Trust корпоративтік қорының қолдауымен «Ерікті қайырымдылық қоғамы» қоғамдық қоры ұйымдастырды.
Науқас 1 жас 8 айлық. Осыдан сегіз ай бұрын үстіне қайнаған су төгіліп, қатты күйіп қалған. Нәтижесінде оң қолында, кеудесінде және мойында айтарлықтай тыртықтар пайда болып, оң қолдың білезік буын мен бас бармағы тыртыққа тартылып шығып кеткен, саусақ қозғалыссыз.
№2 Балалар қалалық клиникалық ауруханасының травматолог-ортопед дәрігері Ұлжан Солтанбекова түсіндіргендей, мұндай хирургиялық араласулар көп жағдайда күйіктен 6 ай өткеннен кейін, тыртық тұрақталғанда жасалады. Осылайша, бұл жолы ота күйіктен сегіз ай өткен соң жасалды. Бірақ кейде аяқ-қолдың жұмысын ертерек қалпына келтіру қажет болады. Өйткені уақыт өте келе сіңірлердің, тамырлар мен нервтердің қысқаруы, буындардың деформациясы және сүйектердің қисық өсуі байқалады. Ал одан кейінгі хирургиялық емдеу айтарлықтай көлемді, бірнеше реттік және күрделі болуы ықтимал.
Ота кезінде дәрігерлер кішкентай науқастың тыртық тінін алып тастап, бас бармағын түзетіп, қалпына келтірді. Пайда болған тері ақауын жабу үшін кәрі жілік артериясымен қанданатын тері жылжытылды. Донорлық аймақ шат аймағынан алынған терімен жабылды.
Қазір баланың жағдайы тұрақты. Келесі айда дәрігерлердің бақылауында болады, ал қолы 3-4 апта бойы гипспен бекітіледі. Қажет болса, болашақта сыртқы түрін, эстетикалық нәтижесін жақсарту үшін қосымша түзету отасы жасалуы мүмкін.
Сарапшылар осындай күрделі оталар хирургтың жоғары біліктілігі мен үлкен тәжірибесін қажет ететінін атап өтті. Мұнда кәрі жілік нервтің жақын орналасуына және артерияның ота үстінде дұрыс бөліп алу күрделілігіне байланысты аса сақтық, дәлдік қажет.
Күрделі отаны №2 БҚКА-ның дәрігерлер тобы ресейлік жетекші маман – пластикалық және қол хирургы Сергей Иванович Голянның басшылығымен жүргізді.
«Мұндай халықаралық «шеберлік сабағына» қатысу алматылық дәрігерлерге заманауи емдеу әдістерін жетік меңгеруге және клиникалық тәжірибеде біліктілігін арттыруға мүмкіндік береді. Біздің мамандар алдағы уақытта заманауи микрохирургиялық технологияларды қолдана отырып, осындай реконструктивтік оталарды өз бетінше орындап, қазақстандық балаларға көмектесе алуға қауқарлы. Біз үнемі инновациялық технологияларды үйренуге, дамуға және осы бағытта алға жылжуға ұмтылатын боламыз», – деп атап өтті №2 БҚКА директоры Марат Рабандияров.
Отадан басқа, осы «шеберлік сабағы» шеңберінде 20 пациентке МӘМС аясында тегін кеңес берілді. Алматы және Қазақстан өңірлерінің медициналық ұйымдарынан 15 маман біліктілігін арттырып, тәжірибе алмасудан өтті.
Мұндай «шеберлік сабақтары» ауыр диагнозы бар балаларға шетел аспай-ақ халықаралық деңгейдегі жоғары технологиялық медициналық көмек алуға мүмкіндік береді.