МЕДИЦИНАЛЫҚ ҰЙЫМДАРДА ПАЦИЕНТТЕРДІ ҚОЛДАУ ҚЫЗМЕТІН КҮШЕЙТУ — МАРАТ ПАШИМОВ

Алматы қаласы Қоғамдық денсаулық басқармасының басшысы Марат Пашимов өткізген кезекті жұмыс кеңесі шұғыл медициналық көмек фельдшері Жанабаева Насиба Мұхтарқызын қызметтік міндетін атқару барысында қаза тапқанына орай бір минут үнсіздікпен басталды.

Кездесу барысында балаларға медициналық көмек көрсету мониторингінің нәтижелері, сондай-ақ қаладағы денсаулық сақтау бағдарламаларының іске асырылуы бойынша ағымдағы көрсеткіштер қарастырылды.

Марат Пашимов екі қалалық балалар ауруханасы базасында «Балалар жасындағы ауруларды біріктіріп жүргізу» (БЖАБЖ) бағдарламасы бойынша практикалық оқу алаңын құруды тапсырды. Бұл жерде емханалар мамандары балалар ауруларын диагностикалау мен емдеудің заманауи әдістерін меңгере алады. Мұндай шаралар балалар өлімін азайтуға және медициналық көмектің сапасын арттыруға ықпал етеді.

Сондай-ақ скринингтік және қашықтан қызмет көрсету көрсеткіштері талқыланып, желтоқсан айының ортасына дейін жоспарланған көрсеткіштерге қол жеткізу міндеттері айқындалды.

Ерекше назар пациенттердің қанағаттану деңгейіне және азаматтардың өтініштерін қарау мәселелеріне аударылды. Медициналық ұйымдардың басшыларына пациенттерді қолдау қызметінің жұмысын күшейту, тұрақты кері байланыс орнату және халықтың өтініштеріне мұқият қарауды қамтамасыз ету тапсырылды.

Кеңес қорытындысында Марат Пашимов атқарылып жатқан жұмыстың басты мақсаты — медициналық көмектің сапасын арттыру және қала денсаулық сақтау жүйесіне халықтың сенімін нығайту екенін атап өтті.

Ол пациенттермен тиімді кері байланыс, медицина қызметкерлерінің кәсіби дамуы және профилактикалық іс-шараларды уақытылы орындау Алматы қаласы Қоғамдық денсаулық басқармасы мен медициналық ұйымдарының басым бағыттары болып қала беретінін айтты.