№2 ҚАЛАЛЫҚ ПЕРИНАТАЛДЫҚ ОРТАЛЫҚТА ТӨРТ СӘБИГЕ «ҚЫРҚЫНАН ШЫҒАРУ» РӘСІМІ ӨТКІЗІЛДІ

 

Бүгін Алматы қалалық №2 перинаталдық орталықта ерекше, мейірім мен қамқорлыққа толы оқиға – мерзімінен бұрын туған төрт сәбиге арналған «Қырқынан шығару» рәсімі өтті.

Барлық сәбилер өте төмен салмақпен – 700-900 грамм аралығында дүниеге келген болатын. Дәрігерлердің жанкешті еңбегі мен медицина қызметкерлерінің махаббатының арқасында олар өмір үшін күресті жеңіп, күшейіп, енді үйлеріне шығаруға дайын.

«Қырқынан шығару» – бұл қазақ халқының ежелгі дәстүрі, ол тазару, баталы болу және жаңа өмірдің басталуын білдіреді.

Рәсім ерекше ыждағаттылықпен өтті: оны перинаталдық орталықтың директоры Светлана Рахимова орталық қызметкерлері мен сәбилердің аналарының қатысуымен өткізді.

Сәбилерді арнайы суға шомылдырып, жылы лебіздер мен ақ тілектер айтылды. Қатысушылардың барлығы балаларға денсаулық, бақыт және ұзақ ғұмыр тіледі.

Бұл күн – жай ғана салтанатты рәсім емес, бұл – өмірдің, үміттің және мықтылықтың нағыз мерекесі. Осы орталықтың әрбір қызметкеріне өз ісіне деген шексіз махаббаты мен әрбір жанға деген адалдығы үшін алғысымызды білдіреміз.