Сайран көлінде судағы қауіпсіздік бойынша ақпараттық акция өтті

Алматы жастары мен Әуезов ауданының Төтенше жағдайлар басқармасының қызметкерлері бірлесіп, Сайран көлінің аумағында тұрғындар арасында ақпараттық-түсіндіру шарасын өткізді.

Іс-шара барысында тұрғындарға Сайран көлінде шомылуға тыйым салынғаны түсіндіріліп, су айдындарында қауіпсіздік талаптарын сақтау жөнінде жан-жақты ақпарат берілді. Сонымен қатар, шомылу кезіндегі қауіпсіздік ережелері мен тыйымдар көрсетілген ақпараттық буклеттер таратылып, азаматтарға өз өмірі мен денсаулығына жауапкершілікпен қараудың маңыздылығы түсіндірілді.

Шараның негізгі мақсаты – тұрғындардың судағы қауіпсіздік талаптары туралы хабардарлығын арттыру, жазатайым оқиғалардың алдын алу және халық арасында қауіпсіздік мәдениетін қалыптастыру.