Алмалы ауданына – 90 жыл

Алмалы ауданы өзінің 90 жылдық мерейтойын атап өтуде. Осы айтулы дата қарсаңында түрлі іс-шаралар ұйымдастырылып, олар әр жастағы тұрғындарды бір арнаға тоғыстырып, Алмалы ауданының тарихын, жетістіктерін және оның дамуына үлес қосқан азаматтарды ерекше ықыласпен еске алуға мүмкіндік берді.

Осындай шығармашылық шаралардың бірі Ганди атындағы саябақта өткен «Менің ауданым – менің тарихым» атты аудандық сурет байқауы болды. «Damu Bala» бағдарламасы аясында жұмыс істейтін үйірмелердің тәрбиеленушілері өз өнерлері мен туған ауданға деген сүйіспеншіліктерін паш етті. Байқауға екі жас санаты бойынша бөлінген 40-қа жуық бала қатысты: кіші топқа 5 пен 11 жас аралығындағы, ал үлкен топқа 12 мен 17 жас аралығындағы балалар қатысты. Барлық қатысушылар марапатталса, әр жас санаты бойынша үздік жұмыстардың авторлары бірінші, екінші және үшінші орындарға ие болды. Алмалы ауданы әкімінің аппараты жас таланттарға шығармашылығы, белсенділігі және туған ауданға деген сүйіспеншілігі үшін шынайы алғысын білдіреді.

№62 мектеп-гимназиясының қабырғасында ауданның 90 жылдығына арналған аға және жас буын өкілдерін біріктірген жылы әрі әсерлі кездесу өтті. Құрметті қонақтар қатарында аудан тарихына өзіндік үлес қосқан ардагерлер болды. Ал мектеп оқушылары қонақтарға арнап би мен әннен тұратын арнайы шығармашылық бағдарлама дайындады. Өнер көрсетілімдерінен кейін жылы әрі еркін форматтағы әңгіме өрбіді. Ардагерлер өз естеліктерімен, өмір жолындағы қызықты оқиғаларымен бөлісіп, жастарға ақыл-кеңестерін айтты. Ал оқушылар олардың әңгімелерін үлкен қызығушылықпен тыңдады. Құрмет пен шынайы алғыстың белгісі ретінде ардагерлерге игі дәстүр бойынша ұлттық шапан жабылды. Бұл кездесу мерекелік іс-шаралардың бірі ғана емес, тарихи жады мен ұрпақтар сабақтастығының маңызын тағы бір мәрте айқындаған тағылымды басқосу болды.

Мерейтойға арналған іс-шаралар легі Иманов гүлзарында өткен «Ұрпақтар ойыны» атты шахмат турнирімен жалғасты. Ашық аспан астында шахмат тақтасының басында қалалық және аудандық Белсенді ұзақ өмір сүру орталықтарының қатысушылары, сондай-ақ жергілікті әлеуметтік клубтың бастауыш сынып оқушылары — жас алматылықтар бас қосты. Тәжірибелі ойыншылар өз білімдерімен қуана бөлісіп, балаларға бағыт-бағдар берсе, жас қатысушылар шахмат ойынына үлкен қызығушылықпен қатысты. Турнир шахматтың әртүрлі буын өкілдерін жақындастырып, олардың өзара қарым-қатынас жасап, уақытты бірге тиімді әрі көңілді өткізуіне тамаша мүмкіндік беретінін тағы бір мәрте көрсетті.

Ауданның мерейтойы — бұл тек шығармашылық және мерекелік іс-шаралар ғана емес, сонымен қатар тұрғындардың әл-ауқатына деген қамқорлық. Алмалы ауданының 90 жылдығына орай бірден алты қалалық емханада Ашық есік күні ұйымдастырылды. Тұрғындар бейінді мамандардан кеңес алып, ЭКГ түсіріп, көру қабілетін тексертіп, стоматологқа қаралып, басқа да маңызды медициналық тексерулерден өту мүмкіндігіне ие болды. Медицина қызметкерлерінің бұл бастамасы денсаулық тілеу жөніндегі дәстүрлі ізгі ниетті нақты іске айналдырды. Өйткені ауданның ең қымбат қазынасы — оның тұрғындарының денсаулығы мен ұзақ ғұмыры.

Мерейтойлық бағдарламаның жарқын спорттық оқиғаларының бірі педагогтер арасында өткен «Алмалы кубогы – 90» аудандық волейбол турнирі болды. Жарысқа аудан мектептерінен 20 құрама команда қатысып, өз шеберліктерін, командалық рухын және жеңіске деген жігерін көрсетті. Турнир қорытындысы бойынша бірінші орынды №24 лицей, екінші орынды №90 мамандандырылған мектеп-лицейі, үшінші орынды №54 мамандандырылған мектеп-лицейі иеленді. Жеңімпаздар мен жүлдегерлер лайықты жеңістерімен құттықталып, барлық қатысушыларға белсенділігі, тамаша ойыны, жоғары энергиясы және спортқа деген сүйіспеншілігі үшін алғыс білдірілді. Ұстаздар білім беру саласында ғана емес, спорт алаңында да жоғары нәтижелерге қол жеткізе алатынын тағы бір мәрте дәлелдеді.

Алмалы ауданының 90 жылдығына арналған мерекелік бағдарлама жалғасуда. Алда аудан тұрғындарын жаңа кездесулер, игі бастамалар, спорттық, мәдени және қоғамдық іс-шаралар күтіп тұр. Мұндай шаралар тұрғындарды біріктіріп, ортақ мерекенің ерекше атмосферасын қалыптастыра береді.