Биыл жазғы маусымда облыста 7 қала сыртындағы және 699 мектеп жанындағы лагерь ұйымдастырылады
Өңір басшысы Асхат Шахаровтың төрағалығымен өткен аппарат мәжілісінде балалардың жазғы демалысын ұйымдастыру мәселесі қаралды.
Білім басқармасының басшысы Бұлбұл Күзембаева атап өткендей, биыл барлығы 291 мыңнан астам бала жазғы демалыспен қамтылады. Бұл үшін 7 қала сыртындағы лагерь (2 мемлекеттік және 5 жеке меншік), 699 мектеп жанындағы лагерь және қосымша білім беру мекемелері жанынан 49 жазғы алаң жұмыс істейді.
Қазіргі уақытта «Әлия», «Campit», «Шұғыла», «Мұғалжар» және «Нефтяник» қалааралық лагерьлерінде ағымдағы жөндеу жұмыстары жүргізілуде. Бес маусымдық лагерь алғашқы кезеңде 1 312 баланы қамтыса, жаз бойы 8 092 оқушы демалатын болады. Әр ауысым 10 күнге созылады. Ал, жыл бойы «Күншуақ» және «Әсем» лагерьлерінде 2 532 бала демалады. Тағы 233 кәмелетке толмаған бала «Балдәурен» және «Бөбек» республикалық балалар орталықтарына барады. 3 960 бала демеушілік қаражат есебінен лагерьге жолдамамен қамтамасыз етіледі», - деді Бұлбұл Күзембаева.
Сонымен қатар, мектеп жанындағы лагерьлерге 161 185 бала, ал қосымша білім беру мекемелері жанындағы 49 жазғы алаңға 21 010 бала барады. Сондай-ақ, 716 оқушы «Жасыл ел» және «Спарта» мектеп шаруашылығына жұмысқа орналасады, 30 мыңнан астам бала туристік жорықтар мен экскурсияларға қатысады.
Мемлекет тарапынан әлеуметтік осал топ өкілдерінің балалары үшін тиісті қолдау көрсетіледі. Мәселен, 21 мыңнан астам жетім және ата-ана қамқорлығынсыз қалған балалар, аз қамтылған, көпбалалы отбасы балалары, мүмкіндігі шектеулі және басқа да санаттағы балалар тегін жазғы демалыспен қамтамасыз етіледі. Әлеуметтік осал топ балаларының 98 пайызы жазғы бағдарламалармен қамтылады.
«Биыл өңірде «Тарих ізімен» атты жаңа жоба жүзеге асырылуда. Оның аясында 28 321 баланы қамтитын 300 өлкетану жасағы құрылады. Отрядтар аймақ пен елдің тарихи орындары мен көрікті жерлеріне барады. 18 колледж базасында кәсіптік бағдар беру лагерлері ашылады. Жұмысшы мамандықтар жылы аясында «SKILLS CAMP» жобасы іске асырылуда, онда 3000 оқушы бірқатар мамандық бойынша оқудан өте алады. Сондай-ақ дарынды балаларға арналған «ЗИЯТКЕР» зияткерлік лагері жұмыс істейді, онда 500 оқушының олимпиадаларға дайындалуға мүмкіндігі бар», – деді облыстың бас ұстазы.
Облыс әкімі жауапты мемлекеттік органдарға балалардың лагерьлердегі қауіпсіздігін, демалыс орындарындағы барлық дайындық жұмыстарының уақытылы аяқталуын және әлеуметтік осал санаттағы балалар үшін демалыстың қолжетімділігін қамтамасыз етуді тапсырды.
Өңір басшысы бірде-бір лагерьдің санитарлық, өрт және қауіпсіздік талаптарына толық сәйкес келмей, балаларды қабылдауына жол берілмеу керектігін атап өтті. Барлық лагерь көпсатылы тексерулерден өтеді, әсіресе медициналық көмекке, тамақтануға, қызметкерлердің біліктілігіне ерекше назар аударылады.
«Әр бала демалып қана қоймай, жаңа білім, тәжірибе мен дағдыларға ие болуы қажет. Жаз әр оқушы үшін қауіпсіз, пайдалы және есте қаларлық болуы тиіс», - деп өңір басшысы сөзін қорытындылады.