Облыс әкімі Қазақстан Жазушылар одағының мүшелеріне сыйақы табыс етті

Облыс әкімі Қазақстан Жазушылар одағының мүшелеріне сыйақы табыс етті
Ақтөбе облысының әкімі Оңдасын Оразалин ақтөбелік ақын-жазушылармен - Жазушылар одағының мүшелерімен кездесті.
«Сіздермен кездесіп тұру дәстүрге айналғанына қуаныштымын. Соның арқасында рухани-адамгершілік мәдениеттің дамуына қатысты өзекті сұрақтар талқыланып, шешілуде, осы бағытта көптеген жобалар жүзеге асырылды»,- деді өңір басшысы сәлемдесу сөзінде.
Соңғы жылдары өңір мәдениетіне ерекше назар аударылуда. Мәселен, екі жыл қатарынан Ақтөбе облысында республикалық әдеби форум өткізіліп келеді, сондай-ақ, жеті атаулы стипендияға қосымша 1 млн теңге көлемінде Өтежан Нұрғалиев, Бәкір Тәжібаев және Қажығали Мұхамбетқалиев есімді жазушылар атындағы тағы үш стипендияны тағайындау жоспарланып отыр. Бұдан өзге, Ақтөбе өңірінің фольклорлық музыкасының антологиясы шықты, кітапханалардың материалдық-техникалық базаларын нығайту, олардың қорын молайту, жас жазушылардың кітаптарын шығару жұмыстары жүргізілуде.
«Былтыр қаламыздың орталығында ұлы ойшыл, ақын Абай Құнанбаевқа ескерткіш тұрғызылған болатын, жыл соңына дейін ақын Төлеген Айбергеновке, композитор Шәмші Қалдаяқовқа ескерткіштер орнатылады, сонымен қатар, Алаш қайраткерлеріне арналған «Тәуелсіздік ақ таңы» мемориалдық кешені ашылды.
Кездесуге барлығы 16 адам шақырылды. Оңдасын Оразалин оларға алғыс хаттар мен 160 мың теңге көлемінде ақшалай сыйақы табыс етті.
Бұдан бөлек, ақын, «Адырна» әдеби журналының редакторы Мейірхан Ақдәулетке 70 жасқа толуына орай құттықтау қағазы берілді.
 
Ақтөбе облысы әкімінің баспасөз қызметі