Ақтөбе лицейі «Білім-инновация» еліміздің үздік үш мектебінің қатарына енді

 

Ақтөбе облыстық мамандандырылған «Білім-инновация» лицей-интернаты дарынды балаларға арналған оқу орны ретінде өз мәртебесін тағы бір мәрте дәлелдеп, 2025–2026 оқу жылының қорытындысы бойынша Қазақстанның үздік үш олимпиадалық мектебінің қатарына енді.

Республикалық ғылыми-практикалық орталық «Дарын» жариялаған «Қазақстанның ТОП-100 олимпиадалық мектебі» рейтингіне сәйкес, лицей республикалық пәндік олимпиадаларға қатысу нәтижелері бойынша елдегі жетекші білім ордаларының бірі ретінде танылды.

2025–2026 оқу жылында лицей оқушылары түрлі деңгейдегі олимпиадаларда жоғары нәтижелер көрсетті. Республикалық пәндік олимпиаданың қорытынды кезеңінде оқушылар 22 медаль жеңіп алды: 4 алтын, 7 күміс және 11 қола . Облыстық кезеңде жүлде қоры 83 медальға жетті: 28 алтын, 27 күміс және 28 қола. Сонымен қатар лицей командасы «Үздік олимпиадалық команда – 2026» номинациясы бойынша Гран-при иегері атанды.

Халықаралық деңгейде де лицей оқушылары зор жетістіктерге қол жеткізді. Олар Тәжікстан, Өзбекстан, Ресей елдеріндегі беделді зияткерлік жарыстарда, сондай-ақ математика, информатика, физика және жаратылыстану пәндері бойынша халықаралық олимпиадаларда жүлделі орындарға ие болды.

Сонымен қатар АҚШ-тың Калифорния штатында өткен FIRST Tech Challenge робототехника жарысында GAMBIT командасы Sea Division дивизионында Think Award (2nd Place) жүлдесін иеленіп, Қазақстан намысын абыроймен қорғады.

1993 жылы құрылған лицей-интернат «Білім-инновация» 30 жылдан астам уақыт ішінде еліміздегі дарынды жастарды даярлайтын жетекші орталықтардың біріне айналды. Бүгінде мұнда 7–11 сыныптарда 251 оқушы білім алады, ал түлектер жыл сайын Қазақстан мен шетелдің беделді жоғары оқу орындарына түсіп, білім сапасының жоғары деңгейін дәлелдеп келеді.

Биыл лицейді 51 оқушы тәмамдайды.