Ақтөбе облысында су тасқынының алдын алу шаралары күшейтілді

Көктемгі су тасқыны кезеңіне дайындық аясында Ақтөбе облысында кешенді инженерлік және профилактикалық жұмыстар жүргізілуде. Өңірдің төтенше жағдайлар қызметі жергілікті атқарушы органдармен бірлесіп, елді мекендерді су басу қаупін азайтуға бағытталған бірқатар шараларды қолға алған.

Қазіргі уақытта облыс аумағында тұрғын үй массивтері мен қауіпті учаскелерден қар шығару жұмыстары қарқынды жүргізілуде. Сонымен қатар автомобиль жолдарындағы су өткізу құрылыстары, нөсер жүйелері мен арық желілері, сондай-ақ су бұру арналары тазартылып, олардың өткізу қабілетін арттыруға басымдық берілуде.

Өзендердегі мұз кептелістерінің алдын алу мақсатында жару жұмыстары ұйымдастырылуда. Облыстық ТЖД мәліметінше, Ойыл ауданындағы Ойыл өзенінің екі учаскесінде жалпы көлемі 1500 шаршы метр аумақ өңделді. Ырғыз ауданындағы тасқын қаупі жоғары учаскелерде де мұзды жару бойынша негізгі жұмыстар жүргізілді. Бұл бағыттағы шаралар облыстың басқа да қауіпті аудандарында жалғасуда.

Департаментте хабарлағандай, жағдай жедел штабтың тұрақты бақылауында. Су нысандары мен қорғаныс құрылыстарының жай-күйіне тәулік бойы мониторинг жүргізілуде. Негізгі мақсат – қардың белсенді еруі кезеңінде тұрғындардың қауіпсіздігін қамтамасыз етіп, инфрақұрылым нысандары мен мемлекеттік мүліктің зақымдануына жол бермеу.