Бұрынғысынан 12 есе үлкен: Шалқардың жас спортшыларына жаңа спорт кешені салынды
Шалқар қаласында болашақ чемпиондарды дайындайтын жаңа, заманауиВ.Н. Цеханович атындағы спорт кешені есігін айқара ашты.
Бұл спорт мектебі бокс, дзюдо және грек-рим күресі бойынша чемпиондарды тәрбиелейтін нағыз ұстахана ретінде танылған.
Жаңа спорт кешенінің ашылу салтанатына облыс әкімінің орынбасары Асылбек Есенбаев, өңірлік коалиция жетекшісі Ербол Данағұлов, жергілікті тұрғындар мен спортшылар қатысты.Салтанатты шараға Самара қаласынан Владимир Цехановичтің қызы – Елена Цеханович арнайы келіп, әкесінің есімі берілген мектептің ашылуына жеке өзі куә болды.
Асылбек Есенбаев шалқарлықтарды қуанышты оқиғамен құттықтап, жобаның ел Президентінің бұқаралық спортты дамыту және спорт инфрақұрылымын кеңейту жөніндегі тапсырмалары аясында жүзеге асқанын атап өтті. Оның айтуынша, жаңа кешен жаттығу мүмкіндіктерін едәуір арттырып, спортпен айналысушылар санын көбейтуге және жоғары деңгейдегі жарыстар өткізуге жол ашады.
«Шалқар өңірі спортшыларымен танымал. Дәл осы жерде республикамыз бен халықаралық ареналарда өңіріміздің абыройын асқақтатқан чемпиондардың бірнеше буыны тәрбиеленді. Олардың қатарында КСРО халықтары Спартакиадасының бес дүркін чемпионы Есенгелді Батырғарин, грек-рим күресінен Қазақстанның еңбек сіңірген спорт шебері, Олимпиада ойындарының қатысушысы Мейрамбек Айнағұлов және әлем чемпионы Қуанышбек Жаңажол бар. Барлығы да Владимир Цеханович атындағы әйгілі спорт мектебінің түлектері.
Бүгін біз ескі мектептің орнында жаңа заманауи спорт кешенін ашып отырмыз. Мұнда бокс, дзюдо және грек-рим күресі бойынша жаттығу мен жарыс өткізуге барлық жағдай жасалған. Енді жас спортшылар осында тәрбиеленіп, жоғары нәтижелерге жетіп, мектептің даңқты дәстүрін жалғастырады», – деді Асылбек Есенбаев.
Сөз барысында облыс әкімінің орынбасары тұрғындарды азаматтық белсенділік танытып, ел Конституциясына маңызды өзгерістер енгізуге бағытталған алдағы референдумға белсенді қатысуға шақырды.
Облыстық коалиция жетекшісі, сондай-ақ грек-рим күресі федерациясының төрағасы Ербол Данағұлов та жас спортшыларға үлкен жеңістер тіледі. Ол жаңа кешеннің өңір спортының дамуына және болашақ чемпиондарды даярлауға қосар үлесін атап өтті. Сонымен қатар тұрғындарды алдағы референдумға белсенді қатысуға үндеді.
Елена Цеханович жастық шағында ескі мектепке жүгіріп келіп, жарыстарды тамашалаған сәттерін еске алды.
«Жаңа спорт кешені керемет, өте үлкен әрі кең екен. Әкемді ұмытпай, оның ісін жалғастырып жатқандарыңызға алғыс білдіремін. Шалқарда оның есімі берілген көше де бар. Барлық жас спортшыларға табанды жаттығып, биік белестерді бағындырып, мектеп пен туған өлкенің абыройын асқақтатуды тілеймін», – деді Елена Цеханович.
Спорт кешені №1 балалар-жасөспірімдер спорт мектебінің базасында салынған. Мұнда грек-рим күресі, бокс және дзюдо сияқты олимпиадалық спорт түрлері бойынша жас спортшыларды дайындауға барлық жағдай жасалған. Залдарда бір мезетте жүзден астам бала жаттыға алады. Бұл қатысушылар санына шектеу қоймай, жаттығулар мен жарыстарды толық көлемде өткізуге мүмкіндік береді. Кешенде жаттығу залы, киім ауыстыратын бөлмелер және 300 орындық трибуна бар.
№1 БЖСМ директоры Дәулет Дәрібаевтың айтуынша, ұзақ жылдар бойы балалар небәрі 300 шаршы метрлік ескі ғимаратта жаттығып келген. 1904 жылы салынған ғимараттың жағдайы заман талабына сай болмаған. 2023 жылы облыс әкімі Асхат Шахаров жұмыс сапары барысында жаттығу жағдайымен танысып, оның тапсырмасымен жаңа кешен салу жобасы басталған.
«Жаңа кешеннің аумағы үш мың шаршы метрден асады. Бұл жаттығу өткізуге және жарыстар ұйымдастыруға өте қолайлы. Мұнда бокс залы, дзюдо залы, спорт алаңы және көрермендерге арналған трибуна бар. Балалар да, ересектер де жаттығуға қуана келеді. Қазір бізде 800-ге жуық адам спортпен шұғылданады. Болашақта олардың саны айтарлықтай артады деп күтеміз. Осындай заманауи жағдай жасағандарыңыз үшін тұрғындар атынан алғыс білдіремін», – деді Дәулет Дәрібаев.
Жас спортшылар да өз әсерлерімен бөлісті.
«Мен боксқа бес жылдан бері қатысамын. Бұл жерге досым Қайсармен бірге келдім. Ағам да боксқа қатысады. Бізге мұнда өте ұнайды. Кең, жарық әрі ыңғайлы болды. Бұрынғы мектепте тар еді, шағын топтармен жаттығатынбыз, енді толыққанды спарринг өткізе аламыз. Осындай залға қуаныштымыз және жоғары нәтижелерге жетеміз деп уәде береміз», – деді Медет Әли.
«Осындай заманауи мектеп үшін еліміздің Президентіне және облыс әкіміне алғыс. Мен 2015 жылдан бері жаттығып келемін және жақсы нәтижелерге қол жеткіздім. Енді жаңа жаттығу құралдарында дайындалып, республикалық жарыстарға толыққанды қатысып, үздік нәтиже көрсетеміз», – деді грек-рим күресі бөлімінің тәрбиеленушісі Санжар Есентаев.
Жаңа спорт кешені тек жаттығу орны ғана емес, аудандық, облыстық және республикалық деңгейдегі жарыстар өтетін заманауи алаңға айналады. Ол болашақ чемпиондарды даярлауға, жастар арасында салауатты өмір салтын насихаттауға және шалқарлықтардың спорттық өмірге белсенді қатысуына жаңа мүмкіндік береді.