Ақтөбе облысында Жұмыспен қамту жол картасы аясында 51 778 жұмыс орны құрылды
Облыс әкімі Асхат Шахаровтың төрағалығымен өткен аппарат мәжілісінде Жұмыспен қамту жол картасының орындалу барысы қаралды.
Жұмыспен қамтуды үйлестіру және әлеуметтік бағдарламалар басқармасының басшысы Ләззат Оразбаеваның айтуынша, бірқатар жұмыспен қамту бағдарламалары бойынша жоспарлы көрсеткіштер Ақтөбе облысында айтарлықтай артығымен орындалған. Мәселен, ұлттық жобалар аясында биыл 3 469 жұмыс орны құрылды, бұл жоспарланған 3 154 орынның 110 %-ын құрайды.
Президенттің «10 мың халыққа – 100 жұмыс орны» бастамасы аясында 12 416 адамды жұмысқа орналастыру жоспарланған еді, алайда іс жүзінде 16 436 жұмыс орны құрылып, жоспар 132%-ке орындалды.
«Дипломмен ауылға» бағдарламасы да жоғары нәтижеге қол жеткізді: жоспарланған 115 маманның орнына ауылдық жерлерге 318 жас маман жолданып, жоспар 276%-ке орындалды.
Жаңа бизнес-идеяларды іске асыру үшін мемлекеттік гранттарды 567 адам алды, бұл жоспарланған 356 адамның 159%-ін құрайды.
Бұдан бөлек, «Ауыл аманаты» бағдарламасы аясында шағын несие алушылар үшін жұмыс орындарын құру – өңірлік жұмыспен қамту картасының маңызды көрсеткіштерінің бірі. Осы бағдарлама бойынша 601 жұмыс орны құрылып, жоспардың (644 орын) 93%-ы орындалды.
Жалпы, 12 мыңға жуық адам «Жастар тәжірибесі», «Алғашқы жұмыс орындары», «Ұрпақтар келісімшарты», «Күміс жас» бағдарламалары, әлеуметтік жұмыс орындары мен қоғамдық жұмыстар арқылы жұмысқа жолданды.
Бұдан бөлек, жекелеген бағдарламалардың артық орындалуына қарамастан, кейбір аудандарда көрсеткіштер жоспардан төмен. Бұл инвестициялардың жеткіліксіздігі, инфрақұрылымдық жобалардың аз болуы және бейресми сектордағы еңбекке тартылуға байланысты. Сол себепті кемшіліктерге жол берген жауапты қала және аудан әкімдерінің орынбасарлары сөгіс алды.
Ләззат Оразбаева сондай-ақ 2026 жылы ҚР Еңбек және халықты әлеуметтік қорғау министрлігімен бірлесе отырып, субсидияланатын жұмыс орындарын бөлу тәртібіне өзгерістер енгізу жоспарланғанын айтты. Енді жұмыс берушілер өз қызметкерлерінің жалпы санының 10%-і көлемінде субсидияланатын жұмыс орындарын ала алады, ал ҮЕҰ мен әлеуметтік кәсіпкерлік субъектілері үшін мүмкіндігі шектеулі адамдарға жұмыс орындарын құру лимиті тиісінше 100% және 50% болып белгіленеді.
Сонымен қатар еңбекақы қорын қосарлы қаржыландырудың алдын алу үшін бюджеттен қаржыландырылатын ұйымдардың қатысуына шектеулер енгізіледі. Олар субсидияланатын жұмыс орындарын тек «Жастар тәжірибесі» жобасы бойынша ғана ала алады.
Басқарма басшысы субсидияланатын жұмыс орындарының азаюына байланысты жылдар бойы осы бағдарламалар бойынша жұмыс істеп келген шамамен 5 мың азаматтың жұмыссыз қалу қаупі бар екенін атап өтті.
Осыған байланысты өңір басшысы аудан әкімдеріне баламалы жұмыс орындарын құру бойынша алдын ала шаралар қабылдауды тапсырды.
«Біз жұмыссыз қалу қаупі бар әрбір адам туралы алдын ала ойлануымыз керек. Аудан әкімдері жаңа жұмыс орындарын белсенді түрде құрып, инвесторларды тартып, өз жобаларын іске қосуы тиіс. Біздің басты мақсатымыз – еңбек нарығындағы тұрақтылықты сақтау және халыққа лайықты жұмыс мүмкіндігін беру», – деді Асхат Шахаров.