Шалқарлық орман қорғаушыларына автокөліктер пен дрон табысталды

 

Ақтөбе облысының Шалқар ауданында Орман шаруашылығы қызметкерлері күні аталып өтті. Биыл сала мамандарына алғаш рет бірден 15 қызметтік автокөлік пен 2 заманауи дрон табысталды.

Шараға облыс әкімінің орынбасары Ғалымжан Елеуов, табиғи ресурстар басқармасының басшысы Исатай Еспағанбетов, орман шаруашылығы және жануарлар дүниесі инспекциясының басшысы Әділгерей Әуелбаев және Шалқар ауданының әкімі Жанболат Жидеханов қатысты.

Автокөліктер мен арнайы техника Үлкен Борсық орман шаруашылығы арқылы өңірдің бірнеше ауданындағы орман мекемелеріне жолданды. Жергілікті мамандардың айтуынша, жаңа дрондар орман алқаптарын қадағалау, өрттің алдын алу және заңсыз кесу деректерін анықтау жұмыстарын айтарлықтай жеңілдетпек.

Облыс әкімінің орынбасары Ғалымжан Елеуов сала қызметкерлерінің еңбегін жоғары бағалап, орманның өңір экологиясы үшін стратегиялық маңызын тілге тиек етті.

«Орман – табиғаттың тірі қалқаны. Оны сақтау – болашаққа жасалған инвестиция. Орман қорғаушылардың жұмысы – экологиялық қауіпсіздіктің алдыңғы шебіндегі күрес», – деді ол.

Мамандардың айтуынша, жаңа техника орман шаруашылығы қызметінің материалдық-техникалық базасын нығайтып, табиғатты қорғау ісін жаңа деңгейге шығарады.