Ақтөбе облысында құны 120 миллиард теңгені құрайтын зауыт салынып жатыр
Зауыт Ақтөбе облысы мен әлемдегі ең ірі цемент өндірушілердің бірі West China Cement компаниясымен бірлесіп жүзеге асуда.
Салынып жатқан жері - Алға ауданының аумағы. Кәсіпорын жылына 2 миллион тонна цемент өндіруге қауқарлы. Жобаның жалпы құны 120 миллиард теңге. Нысан құрылысы 2026 жылдың соңына қарай аяқталады деп жоспарланған.
Бүгінде жобаға 1000-ға жуық жұмысшы тартылыпты. Қазіргі уақытта инженерлік желілерді тарту және қызметкерлерге арналған жатақхана құрылысы жүргізілуде. Ал зауыт іске қосылғанда, кәсіпорында 500 тұрақты жұмыс орны ашылады.
Облыс әкімі Асхат Шахаров Алға ауданына жұмыс сапарында аталған жобаның жүзеге асырылу барысымен танысты. «Aktobe Cem» ЖШС-ге қарасты цемент зауыты - Ақтөбе облысы мен ҚХР арасындағы байланысты нығайта түспек.
Облыс әкімінің айтуынша, жоба құрылысы өңірдің өнеркәсіптік әлеуетін арттырып, инфрақұрылымды дамытуға және өңірге қосымша инвестициялар тартуға серпін береді.
«Алға инвестициялар тартудың орталығына айналуда. Мұндай зауыттың іске қосылуы жаңа жұмыс орындарын ашып, облыстың индустриялық әлеуетін арттыруға зор үлес қосады. Мемлекет басшысы өз Жолдауында шикізатты терең өңдеу, импортты алмастыру міндеттерін қойды. Осы жоба цемент импортына тәуелділікті азайтып, ішкі нарықты құрылыс материалдарымен тұрақты қамтамасыз етуге мүмкіндік береді. Ең бастысы – құрылыс кестеге сай және барлық технологиялық талаптарды сақтай отырып жүргізілуі қажет», - деді Асхат Шахаров.