Ақтөбеде жұмысшы мамандықтарына бөлінген орын саны екі есеге артты

Ақтөбеде өткен дәстүрлі тамыз конференциясында облыстың білім беру саласындағы жаңа жоспарлар мен жетістіктер жария етілді. Облыстық білім басқармасының басшысы Бұлбұл Күзембаева Жұмысшы мамандықтар жылында жұмысшы кадрларды даярлау бағытындағы жаңалықтармен бөлісті.

«Мемлекет басшысы атап өткендей, жаңа буын жұмысшы кадрларын – заманауи, мобильді әрі бәсекеге қабілетті мамандарды даярлау бүгінгі күннің басты міндеттерінің бірі. Бұл тұрғыда Ақтөбе өңірінде «Балабақша – мектеп – колледж – өндіріс» қағидаты бойынша үздіксіз білім беру тізбегі дамып келеді», - деді облыстың бас ұстазы.

Оның сөзінше, өңірде жаңа оқу жылында мемлекеттік тапсырыс аясында жұмысшы мамандықтарына бөлінген орын саны екі есеге көбейген. Колледждерге жалпы саны 7390 мемлекеттік гранттық орын бөлінсе,  соның ішінде 4325 түлек ауыл шаруашылығы, қызмет көрсету және техникалық бағыттағы мамандықтарды таңдаған.

Сонымен қатар, биылғы жылы екі колледж «Гүл өсіруші – флорист», «Қонақ үй бизнесі» және «Тамақтану саласында қызмет көрсетуді ұйымдастыру» сияқты үш мамандыққа лицензия алыпты.

Бұлбұл Күзембаев дуалды оқыту жүйесі кеңейіп келетінін де айтып өтті. Бүгінде облыстағы 27 колледжде 59 мамандық бойынша 1160 кәсіпорынның қатысуымен дуалды оқыту жүзеге асырылып жатыр.

Білім саласында жүргізіліп жатқан жүйелі жұмыстардың барлығы Ақтөбе облысының колледждерін заманауи білім беру инфрақұрылымына айналдыруға бағытталған.