📢 Тілім менің – баға жетпес байлығым

2025 жылғы 10 қыркүйекте Ақтөбе қаласында «Тілім менің – баға жетпес байлығым» атты республикалық семинар-кеңес өтті. Іс-шараны Ақтөбе облысының Тілдерді дамыту басқармасы ұйымдастырды.

Семинар-кеңестің негізгі мақсаты – мемлекеттік тілдің қолданыс аясын кеңейту, оны қоғамдық өмірдің барлық саласында тұрақты қолдануды қамтамасыз ету, сондай-ақ халық арасында тіл мәдениетін көтеру болды.

Іс-шараға Қазақстан Республикасы Тіл саясаты комитеті төрағасының орынбасары Асан Эльмира Арсыланқызы қатысып, құттықтау сөз сөйлеп, мемлекеттік тілдің қазіргі қоғамдағы маңызы мен болашағына тоқталды.

Семинар барысында қазақ тілін оқытудың заманауи әдістемелері таныстырылып, сауатты жазу мен дұрыс сөйлеудің мәні талқыланды. Сондай-ақ жасанды интеллект пен медиа саласында мемлекеттік тілдің қолданылуы, көрнекі ақпараттағы заң талаптарының сақталуы және сот істерін мемлекеттік тілде жүргізу мәселелері қарастырылды. Бұдан бөлек, мемлекеттік тілдің қолданыс аясын кеңейту жолдары мен жастардың тілге деген құрметі мен қызығушылығын арттыру бағыттары сөз болды.

Семинар жұмысына Қазақстанның әр өңірінен келген 70-ке жуық қатысушы – тіл мамандары, заңгерлер, медиа өкілдері және жастар қатысты.

Шара соңында бірқатар тіл жанашырлары «Ана тілі» төсбелгісімен, Қазақстан Республикасының Ғылым және жоғары білім министрлігінің Құрмет грамоталарымен және Алғыс хаттарымен, сондай-ақ Ақтөбе облысы әкімінің және облыстық Тілдерді дамыту басқармасы басшысының Алғыс хаттарымен марапатталды.

Осылайша, «Тілім менің – баға жетпес байлығым» республикалық семинар-кеңесі мемлекеттік тілдің мәртебесін көтеруге, оның заманауи бағыттарда қолданылуын кеңейтуге және қоғамда тіл мәдениетін дамытуға серпін берген маңызды алаң болды.