📣 «ӘЛИЯ – ЕРЛІКТІҢ РУХЫ МӘҢГІЛІК» КВЕСТ ОЙЫНЫ

2025 жылғы 12 маусым

Ақтөбе қаласы, «Мәңгілік алау» мемориалды кешені

Ақтөбе облысының тілдерді дамыту басқармасы мен Тілдерді оқыту орталығының ұйымдастыруымен Кеңес Одағының Батыры Әлия Молдағұлованың 100 жылдық мерейтойына арналған «ӘЛИЯ – ЕРЛІКТІҢ РУХЫ МӘҢГІЛІК» атты мазмұны терең, тәрбиелік мәні зор квест ойыны өткізілді.

Шара мақсаты:

ҚР Тіл саясатын дамытудың 2023–2029 жылдарға арналған тұжырымдамасын іске асыру;

Қазақ халқының батыр қызы Әлия Молдағұлованың ерлік бейнесін жас ұрпаққа үлгі ету;

Мемлекеттік тілді практикалық қолданыс арқылы меңгеруді жетілдіру;

Қатысушылардың тілдік, логикалық, командалық және шығармашылық қабілеттерін дамыту.

Қатысушылар:

Квестке Ақтөбе облыстық Тілдерді оқыту орталығының тіл үйренушілерінен құралған 4 команда қатысты:

М.Оспанов атындағы Батыс Қазақстан медицина университеті

«KEGOC» АҚ

Ақтөбе облыстық Полиция департаменті

Төтенше жағдайлар департаменті

Квест мазмұны:

Квест ойыны бірнеше кезеңнен тұрды. Әрбір тапсырма тіл үйренушілердің білімін, тапқырлығын, шешендігін және тарихи танымын арттыруға бағытталды.

«Ерлік – елге мұра» – қатысушылар өз ұрандарын, сурет немесе ой-тұжырымдарын жасап, Әлия ерлігін заманауи тілмен жеткізді.

«Мергендік сайыс» – шар жарып, ішіндегі сұрақтарға жауап беру арқылы тарихи және тілдік білім сыналды.

«Әлия» – пазл миссиясы – батыр бейнесін құрастыру арқылы ұжымдық ойлау мен байқағыштықты дамытуға ықпал етті.

«Батырлар аллеясы» – жасырын тапсырманы орындап, бейнеқұттықтау жазу арқылы сөйлеу мәдениетін шыңдады.

«Финиш» – қатысушылар Әлияға арналған жүрекжарды өлеңдерін оқып, рухани тебіреністі бөлісті.

Қорытынды бөлімде Ақтөбе облысының тілдерді дамыту басқармасының басшысы Амангелді Құрманғазыұлы Қонақбаев қатысушыларға алғысын білдіріп, шараның тәрбиелік және тілдік маңызын ерекше атап өтті. Ол барлық командаларға сәттілік тілеп, осындай рухты іс-шаралардың жалғасын табуын тіледі.

Нәтиже:

Іс-шара соңында барлық қатысушылар марапатталып, естелік суретке түсті. Квест ойыны мемлекеттік тілді тәжірибе арқылы үйретудің тиімді әдісі ретінде танылды.