Көркем тіл - көрікті жарнама

 

Мемлекеттік тіл мәртебесін арттыру және қазақ тіліне құрметпен қарауды қалыптастыру мақсатында Ақтөбе облысында «Көркем тіл – көрікті жарнама» акциясы жүзеге асырылуда. Жобаның негізгі мақсаты-мемлекеттік тілдің көрнекі ақпаратта, жарнамада және іс жүргізуде сауатты қолданылу деңгейін арттыру . Акция аясында жарнамалық мәтіндердегі, белгілердегі, хабарландырулардағы және басқа да көрнекі ақпарат құралдарындағы орфографиялық және стилистикалық қателерді анықтауға және түзетуге ерекше назар аударылады.

"Акция шеңберінде лингвист-мамандардан, филологтардан, қоғам қайраткерлерінен және еріктілерден тұратын мониторингтік топ қызмет атқарады. Мониторинг жұмыстарының қорытындысы бойынша жарнамалардың үздік үлгілері марапатталатын болады. Барша тұрғындарды, кәсіпкерлерді акцияны қолдауға және Ана тілі мәдениетін дамытуға үлес қосуға шақырамыз" - деді «Тұтынушылар ұлттық палатасы» Республикалық қоғамдық бірлестігінің президенті Ислам Болатов өңірлік коммуникациялар қызметінде өткен баспасөз конференциясында.

Айта кетейік, «Тұтынушылар ұлттық палатасы» Республикалық қоғамдық бірлестігі азаматтарға құқықтық көмек көрсету, қаржылық және заңдық сауаттылықты арттыруға бағытталған оқыту шараларын ұйымдастыру, сондай-ақ тұтынушылардың мүдделерін қорғаумен айналысады. Спикер саладағы қоғамдық бақылауды күшейту, заңнаманы жетілдіру және азаматтардың құқықтық сауаттылығын арттыру мемлекет пен қоғам үшін маңызды міндет екенін атап өтті.