Қазақстан халыққа ауыз судың құнын арзандату бағытында шаралар қабылдауда

Мемлекет басшысының тапсырмасына сәйкес республика бойынша халықты 100% ауыз сумен қамту мақсатында су жүйелерін салу және қайта жаңарту жұмыстары жүргізілуде. «Халықты сапалы сумен жабдықтау және су бұру қызметтерімен қамтамасыз етумен қатар мемлекет тарапынан ауыз судың құнын арзандату бағытында халықты қолдау жөнінде шаралар қабылдануда. Су кодексіне сәйкес сумен жабдықтау және су бұру саласындағы мемлекеттік қолдаудың негізгі түрлерінің бірі сумен жабдықтау жүйелерінен ауыз су беру қызметтерінің құнын субсидиялау болып табылады», – деді ҚР ӨҚМ Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков ОКҚ алаңында өткен баспасөз конференциясында. Оның айтуынша, қолдаудың осы түрін қамтамасыз ету үшін Министрлік үш нормативтік-құқықтық актіні бекітті: - Сумен жабдықтау жүйелерінен ауыз су беру жөніндегі қызметтердің құнын субсидиялау қағидалары; - Бір текше метр ауыз судың құнын есептеу әдістемесі; - Елді мекендерде сумен жабдықтау жүйелерін қосу критерийлері.