Барлық ниет білдірген азамат ауыл шаруашылығы санағын өткізу жөніндегі жұмысқа шақырылады

Биыл Қазақстанда Ұлттық ауыл шаруашылығы санағы өтеді. Бұл - Қазақстанның аграрлық секторын және азық-түлік қауіпсіздігін тұрақты дамыту үшін стратегиялық маңызды іс-шара. Алынған деректер тиімді мемлекеттік саясат пен барлық деңгейдегі ауыл шаруашылығы өндірушілерін қолдау үшін негіз болады. Санақ жүргізу үшін жұмыссыз азаматтар, студенттер, сондай-ақ барлық ниет білдіргендер арасынан 3700-ден астам адамды интервьюер ретінде тарту жоспарлануда. Олар үшін арнайы оқыту жүргізіледі. Бұл туралы ОКҚ-да өткен баспасөз мәслихатында ҚР СЖРА Ұлттық статистика бюросының басшысы Мақсат Тұрлыбаев мәлімдеді. Оқыту Data Literacy Hub Бюросының онлайн-платформасында ұйымдастырылады, онда қатысушыларға түрлі оқу материалы қолжетімді болады. Оның ішінде мәтіндік құжаттар, бейнероликтер және бейне слайдтар бар.
«Оқу аяқталғаннан кейін барлық қатысушы өздерінің білімі мен жұмысқа дайындығын растау үшін міндетті тестілеуден өтуі керек. Мұндай тәсіл санақ жүргізудің жоғары сапасын және жиналған деректердің дәлдігін қамтамасыз етеді», – деді спикер.

Ол қазірдің өзінде қызметкерлерді қабылдау жұмыстары жүргізіліп жатқанын атап өтті. Сұхбат берушілер мен нұсқаушылар ретінде санаққа қатысқысы келетіндердің барлығы «1446» нөмірі бойынша байланыс орталығына өтініш қалдыра алады.

Сонымен қатар өткен аптада «Қазпошта» АҚ-мен меморандумға қол қойылды, онда ауыл шаруашылығы санағына интервьюерлер ретінде пошташыларды тарту мүмкіндігі қаралды. Санаққа 2025 жылы республикалық бюджеттен 3,7 млрд теңге сома қаржы бөлінеді. Шығындардың негізгі бөлігі техникалық жабдықтауға, ақпараттық жүйелерді қолдауға және еңбекақы төлеуге жұмсалмақ.

«Барлық кезең аяқталғаннан кейін біз 2025 жылғы желтоқсандағы санақтың алдын ала қорытындыларын жариялаймыз. Түпкілікті жиынтық деректер мен талдамалық есептер Ұлттық статистика бюросының сайтында орналастырылады және 2026 жылы жұртшылыққа ұсынылады», – деп қорытындылады Мақсат Тұрлыбаев.