Байғанин ауданында жергілікті ауқымдағы табиғи сипаттағы төтенше жағдай жарияланды

Аудан орталығында қатты екпінді желден байланыс мұнарасы жеке орналасқан бірқабатты дүкеннің шатырына құлап, үш адам зардап шекті. Олардың барлығына аудандық ауруханада қажетті медициналық көмек көрсетілді.

Аймақ басшысы Асхат Шахаровтың тапсырмасымен облыс әкімінің орынбасары Ғалымжан Елеуов Байғанин ауданына барды. Ол желден бүлінген дүкен аумағын бағамдап, электр желілерін қалпына келтіру жұмыстарының барысымен танысты. Авариялық бригада үздіксіз жұмыс істеуде.

Одан кейін Ғалымжан Елеуовтің төрағалығымен төтенше жағдайлар жөніндегі комиссия отырысы өтті. Жиында қалыптасқан жағдай жан-жақты талқыланып, зардап шеккен нысандардың тізімін жасақтау, келтірілген шығынды бағалау, тұрғындардың қауіпсіздігін қамтамасыз ету және жауапты мекемелердің іс-қимылын үйлестіру мәселелері қаралды. Бүгінде барлық қызмет күшейтілген жұмыс тәртібіне көшті.

«Жағдай - облыс әкімінің жеке бақылауында. Оның тапсырмасымен комиссия құрылып, шұғыл түрде ауылға жеттік. Ең бастысы - адамдар дін аман. Зардап шеккен тұрғындарға заңға сәйкес, қажетті қолдау көрсетіледі, ешбірі көмексіз қалмайды. Біз табиғи апаттың салдарын жою жұмыстарына тез арада кірісуіміз керек», - деді облыс әкімінің орынбасары.