Ақтөбеде қысқы спорт түрлеріне қызығушылық артуда

Ақтөбе облысының әкімі Асхат Шахаров Мұз аренасына барып, бапкерлермен кездесіп, жастардың қысқы спорт түрлеріне қызығушылығының артып келе жатқанын жеткізді. Ол жас спортшылардың жаттығу жағдайларымен, аренаның жабдықталу деңгейімен және секциялардың көпбалалы және әлеуметтік осал отбасылардан шыққан балалар үшін қолжетімділігімен танысты.

Бапкерлердің айтуынша, хоккей, мәнерлеп сырғанау және басқа да қысқы спорт түрлерімен айналысқысы келетін балалардың қатары күн санап артып келеді. Олар үшін барлық қажетті жағдайлар жасалған: кең киім ауыстыратын бөлмелер, заманауи жабдықтар, білікті жаттықтырушылар бар. Бүгінде Ақтөбеде қысқы спортпен айналысу үшін басқа өңірлерден көшіп келген 10 отбасы тұрады. Бұл отбасыларға жан-жақты қолдау көрсетілуде.

«Бізде жастар құрамасы мықты. Балалар жүлде үшін таласа алады. Ересектерге сәл қиын болады, өйткені көптеген командалар легионерлермен күшейіп жатыр. Дегенмен бізде де әлеует бар. Жастар құрамасын өзіміздің ойыншылармен толықтыра аламыз», – деп атап өтті «Облыстық шайбалы хоккей федерациясы» ҚБ президенті Бақытжан Жаманқұлов.

Асхат Шахаров қысқы спорт түрлерінің дамуы тек спорттық жетістіктер тұрғысынан ғана емес, сонымен қатар жастардың денсаулығы мен бос уақытын тиімді өткізуіне қосқан үлесі ретінде де маңызды екенін атап өтті. Жаппай сырғанау, бірнеше спорт түрін таңдауға мүмкіндік, қалалық және республикалық турнирлерге қатысу – мұның барлығы өсіп келе жатқан ұрпақтың салауатты және белсенді өмір салтын ұстануына ықпал етеді.

«Мұз аренасы» мемлекеттік-жекешелік әріптестік аясында салынған. Қазіргі таңда нысан Ақтөбе қаласындағы №5 балалар-жасөспірімдер спорт мектебі «Олимп» балансына берілген. Кешен 1800–2000 адамға арналған, жаппай сырғанауға мүмкіндік бар. Көрермендер трибунасы 2500 адамға дейін сыяды. Мұнда хоккей, шорт-трек, мәнерлеп сырғанау және басқа да спорт түрлері бойынша жаттығулар мен жарыстар өткізіледі.