Бүгін “Жұбановтар әлемі” ғимаратында “Бетбұрыс” әлеуметтік жобасының 5 кезеңінің жабылу салтанаты өтті.

Жобаның мақсаты – әйел ментилерге өз ісін ашуға қажетті құзыреттер мен білім беру, олардың қаланың экономикасын дамытуға бағытталған әлеуетін ашу, мотивацияны арттыру, сондай-ақ кәсіпкерлік қызметті бастауға кедергі келтіретін психологиялық және әлеуметтік тосқауылдарды жою, әлеуметтік қолдауға қол жеткізуге, бизнес негіздеріне ден қоюға және өз потенциалдарын іске асыруға мүмкіндік беру.

2025 жылғы 10–30 маусым аралығында жобаның V маусымының іріктеу кезеңі өтті. Сұхбаттасу нәтижесінде 57 үміткердің ішінен 25 әйел жобаның қатысушысы ретінде таңдалды.

Ағымдағы жылдың 9 шілдесінен бастап, 1 ай көлемінде жоба қатысушыларына әлеуметтік, құқықтық, психологиялық және білім беру бағыттары бойынша кешенді ақпараттық-кеңестік қызметтер ұсынылды.

«БЕТБҰРЫС V» жобасы аясында менторлар ретінде бизнесте табысқа жеткен, өз тәжірибесі мен білімін бөлісуге дайын кәсіпкерлер қатысты. Олар оқыту курстары, шеберлік сабақтары және тренингтер форматында қатысушыларға қолдау көрсетті.

Сонымен қатар, жоба қатысушылары бір-бірімен тәжірибе алмасу мақсатында шеберлік сағаттарын өткізіп, қала аумағында орналасқан кәсіпорындарға өндірістік тур ұйымдастырылды.
Жобаның бесінші кезеңінің салтанатты жабылу рәсіміне қалалық мәслихат депутаттары, Қоғамдық кеңестің мүшелері, сондай-ақ жобаның алдыңғы маусымдарының түлектері шақырылды.

Сондай-ақ, іс-шара аясында жоба қатысушыларының қолөнер және өз өнімдерін ұсынатын көрме-жәрмеңкесі ұйымдастырылды.