Биыл облыста газдандырылған ауылдар саны 196-ға жетеді

Облыс әкімінің төрағалығымен өткен жиында өңірді газдандыру және бекеттердегі газ тапшылығын жою мәселелеріне баса назар аударылды.

Бірінші мәселе бойынша энергетика және тұрғын үй-коммуналдық шаруашылық басқармасының басшысы Арысұлан Айтбаев баяндама жасады. Ол облыстағы елді мекендерді газдандыру жоспарлары туралы айтты.

Өңірдегі 319 елді мекеннің 172-сі (немесе 53,9%) газбен қамтамасыз етілген. Биыл 9,1 млрд теңге сомасына 14 ауыспалы жобаны аяқтап, 9,8 мың тұрғыны бар 23 ауылды газға қосу жоспарланды.

Сонымен қатар, «QazaqGaz Aimaq» АҚ инвестициялық бағдарламасы аясында Мұғалжар ауданы Қожасай ауылын газдандыру аяқталады. Осылайша, жыл қорытындысы бойынша газбен қамту 196 ауылға (61,4%) ұлғаяды.

Бұған қоса, 8 жаңа жоба бойынша 4,7 млрд теңгеге бюджеттік өтінім берілді. Оларды өткізген жағдайда 206 елді мекен (64,6%) және 901,5 мың адам (97,1%) газбен қамтамасыз етіледі.

«Ақтөбеде магистральдық газ құбырының үшінші желісінің құрылысын аяқтау маңызды кезең болды, бұл өткізу қабілетін сағатына 526,5 мың текше метрге дейін арттыруға мүмкіндік берді. Газ құбырын қалалық әкімдіктің балансына беру үшін құжаттар дайындалды», - деді А. Айтбаев.

Аймақ басшысы ауылдық елді мекендерді газдандырудың басымдығын атап өтіп, барлық жобалардың нақты орындалуын қамтамасыз етуді тапсырды.

«Ауылдарды газдандыру мәселесі өте маңызды. Осы жылға жоспарланған жобалардың уақытылы және сапалы іске асырылуын қамтамасыз ету қажет. Энергетика және тұрғын үй-коммуналдық шаруашылық басқармасына, сондай-ақ аудан әкімдеріне бұл мәселені тұрақты бақылауда ұстауды тапсырамын», - деді өңір басшысы.