Хромтау аудандық жұмыспен қамту және әлеуметтік бағдарламалар бөлімінің басшысы Дәурен Тұрлыбаев 2025 жылдың қорытындылары мен 2026 жылға арналған жоспарларды таныстырды.
Бөлім басшысының мәліметінше, жұмыспен қамту саласындағы мемлекеттік саясат Қазақстан Республикасының еңбек нарығын дамыту жөніндегі 2024–2029 жылдарға арналған тұжырымдамасы аясында іске асырылуда. 2025 жылы ауданда 3 465 адамды жұмыспен қамту жоспарланса, нақтысында 3 970 адам тұрақты және уақытша жұмыс орындарына жолданған. Оның ішінде 2 609 адам тұрақты жұмысқа орналасса, 725 адам белсенді жұмыспен қамту шараларына тартылды.
Белсенді шаралар шеңберінде қоғамдық жұмыстарға, әлеуметтік жұмыс орындарына және «Күміс жас» жобасына қатысушылар саны жоспардан асыра орындалды. Сондай-ақ жастарды қолдау бағытында «Жастар практикасы», «Алғашқы жұмыс орны» және «Ұрпақтар келісімшарты» жобалары іске асырылып, барлық көрсеткіштер жоспардан жоғары деңгейде орындалды.
Кәсіпкерлікке баулу мақсатында «Бастау Бизнес» жобасы бойынша 2025 жылы 442 адам қысқа мерзімді оқудан өтті. 2026 жылы облыстық кешенді жоспар аясында 20 адамды 3–6 айлық кәсіптік оқыту жоспарланған. Оқыту Хромтау тау-кен колледжі базасында ұйымдастырылады.
Әлеуметтік осал санаттағы азаматтарды қолдау мақсатында қайтарымсыз мемлекеттік гранттар берілуде. 2025 жылы 23 азамат 400 АЕК көлеміндегі грант алып, жеке ісін бастады. 2026 жылы 15 адамға грант беру жоспарланған.
Жыл қорытындысы бойынша аудандағы жұмыссыздық деңгейі 3,4% құрады. Қазіргі таңда 71 бос жұмыс орны тіркелген. Бос жұмыс орындарының басым бөлігі медицина, білім беру және өндіріс салаларында.
2026 жылы да халықты жұмыспен қамту, кәсіпкерлікті дамыту және әлеуметтік қолдау шаралары жүйелі түрде жалғасатын болады.
Хромтауда жұмыспен қамту саласының 2025 жылғы қорытындылары мен 2026 жылға жоспарлар таныстырылды
