Сирияға аттанғандардың көбі – шетелдегі күмәнді оқу орындарында білім алғандар
Бақтыбай БЕЙСЕНБАЕВ, "Астана" медресе-колледжінің директоры:
⠀
- Соңғы жылдары әртүрлі діни ағымдардың белсенділігінің артуы, экстремистік, террористік ұйымдардың ашық наразылыққа шығуымен қоғамдық-саяси және діни ахуал күрт күрделенді. Бұған қоса, әртүрлі жалған және деструктивті ұйымдарға мүше атанып үлгерген, шетелде діни білім алған азаматтар Қазақстан аумағында өз жамағаттарын, қатарларын толықтыруды көздейтіндігі анықталды.
⠀
Сол үшін ел азаматтары, оларға жауапты ата-аналар өз балаларының білім алатын елін таңдау барысында сол мемлекеттің қоғамдық-саяси және діни ахуалы туралы ой түйіп, оның тарихын, мәдениетін, діні мен ділін біліп алғаны жөн.
⠀
Бұл жағдайдың бәрінде де ата-ананың орны өте жоғары. Баланың қайда барып, кімнен, не оқып үйренетінін, қай мамандықтың иесі атанатынын алдын ала білгені дұрыс.
⠀
Алдын ала шетелде оқуға ниетті үміткерлермен түсіндіру жұмыстары жүргізілу керек. Себебі, кешегі Сирияға аттанғандардың көбі – шетелдегі күмәнді оқу орындарының түлектері.