Жаңғырту бағыты: Ақтөбеде ұзын өлшемді рельс шығаратын ауқымды жоба жүзеге асырылуда

Ақтөбеде өнеркәсіп саласындағы маңызды инвестициялық жобалардың бірі — ұзын өлшемді рельс шығаратын рельс дәнекерлеу зауытының құрылысы басталды. Бұл кәсіпорын жылына 825 шақырымға дейін рельс өндіруге қауқарлы болады. Жоба Қазақстанның теміржол инфрақұрылымын жаңғыртудағы маңызды кезеңдердің біріне айналмақ.
Жобаның бастамашысы — «ПЗТМ LTD» ЖШС, ал бастама Индустрияландырудың Бірегей картасына енгізілген. Жалпы инвестиция көлемі 21,4 млрд теңгені құрайды, ал жобаны іске асыру 200-ден астам жаңа жұмыс орнын ашуға мүмкіндік береді.
Жаңа өндірістің басты ерекшелігі — ұзындығы 800 метрге дейінгі рельстердің шығарылуы. Бұл қазіргі қолданыстағы стандарттардан едәуір артық. Мұндай рельстер темір жолдарды айтарлықтай жақсартады: пойыз қозғалысы кезінде соққы мен дірілді азайтады, жылжымалы құрамның қызмет ету мерзімін ұзартады және жолаушылар үшін жайлылық деңгейін арттырады.
Жоба «Қазақстан темір жолы» АҚ-мен жасалған оффтейк-шартпен қамтамасыз етілген, бұл өнімнің ішкі нарықта тұрақты өткізілуіне кепілдік береді.
Тағы бір стратегиялық артықшылық — зауыттың 120 метрлік рельстер шығаратын Ақтөбе рельс-арқалық зауытына жақын орналасуы. Бұл логистика мен тасымалдау шығындарын оңтайландыруға мүмкіндік береді. Сонымен қатар, кәсіпорынның Ресей Федерациясымен шекараға жақын орналасуы экспортқа жол ашады.
Қазіргі уақытта құрылыс-монтаж жұмыстары, жабдықтарды жеткізу, алаңды жайластыру және негізгі өндірістік пен әкімшілік нысандарды салу жүргізілуде. Зауытты іске қосу 2026 жылға жоспарланған.
Жобаның жүзеге асырылуы өңірлік кәсіпкерлер палатасының тұрақты бақылауында. Палата өкілдері жобаны жергілікті жерде тексеріп шықты.
«Инвесторға «ҚТЖ» АҚ теңгерімінде тұрған қосымша жер телімін бөлу қажеттілігі туындады. Бұл мәселе жедел түрде әкімдікпен бірлесіп қаралып, инвестордың пайдасына шешілді», — деді ӨКП директорының экономикалық мәселелер жөніндегі орынбасары Владимир Сухорученко.
«ПЗТМ LTD» ЖШС директорының орынбасары Марат Дадабаевтың айтуынша, бүгінде жобаны іске асыруда елеулі кедергілер жоқ — барлық жұмыстар жоспарға сәйкес жүріп жатыр.
Болашақта компания темірбетоннан жасалған ауыр шпалдар өндіру арқылы өндірісті кеңейтуді жоспарлап отыр. Бұл кәсіпорынның ұлттық қана емес, халықаралық нарықтағы позициясын да күшейте түспек.