Ақтөбеде жаңа мектеп ашылды

Білім күні – 1 қыркүйекте «Саяжай» тұрғын массивінде «Келешек мектептері» ұлттық жобасы аясында жаңа заманауи №84 жалпы білім беретін мектеп өз есігін айқара ашты.

Жаңа мектеп табалдырығын 503 оқушы аттап, олардың білім алуы мен тәрбиесі 40 білікті педагогке сеніп тапсырылды.

Мектепте сапалы білім беруге барлық жағдай жасалған. Дайындық тобы мен бастауыш сыныптарға арнайы жабдықталған кабинеттер қарастырылған. Жоғары сынып оқушылары үшін физика, химия, биология кабинеттері, екі информатика кабинеті, STEM зертханасы мен заманауи робототехника кабинеттері жұмыс істейді.

Оқушылардың шығармашылық және тәжірибелік тұрғыда дамуына да ерекше көңіл бөлінген. Оқушылардың игілігіне технология кабинеті, тігін шеберханасы, музыка және хореография кабинеттері, сондай-ақ алғашқы әскери және технологиялық дайындық кабинеті ұсынылған. Сонымен қатар оқу-тәрбие үдерісін әлеуметтік педагог, психолог, логопед, сенсорлық бөлмелер мен ерекше білімді қажет ететін балаларға арналған кабинеттер қолдайды.

Спортпен шұғылдану мен салауатты өмір салтын қалыптастыру үшін кең спорт залы салынған. Оқушылар мен ұстаздардың игілігіне заманауи асхана мен 80 орындық мәжіліс залы қарастырылған. Білімге деген сүйіспеншіліктің символына айналған жайлы оқу залы мен 8 мыңнан астам кітап қоры бар кітапхана рухани орталыққа айналды.

Бүгінгі таңда КММ «№84 жалпы білім беретін орта мектеп» – бұл жай ғана жаңа мектеп емес, балалардың жан-жақты дамуына мүмкіндік беретін қауіпсіз әрі жайлы орта қалыптастырған заманауи білім ордасы. Мұнда озық технологиялар, отандық білім берудің ең үздік дәстүрлері және болашақ ұрпақты заман талабына сай тәрбиелеу ұмтылысы тоғысады.