Ақтөбеде «Білім келешегі: адал азамат, кәсіби маман» атты облыстық тамыз конференциясы өтті

Ақтөбеде дәстүрлі «Білім келешегі: адал азамат, кәсіби маман» педагогтердің облыстық тамыз конференциясы өтті. Конференция Өнер орталығында ұйымдастырылып, оған Қазақстан Республикасы Оқу-ағарту бірінші вице-министрі Майра Тұрғанбайқызы Мелдебекова, облыс әкімі Асхат Берлешұлы Шахаров, сондай-ақ білім саласының жетекші мамандары, ұстаздар мен педагогикалық қауым өкілдері қатысты.

Конференция аясында жас ұстаздармен кездесу өткізіліп, білім саласындағы үздік жетістіктер мен жаңа жобалар таныстырылған көрме жұмыс жасады.

Пленарлық отырыста ҚР Оқу-ағарту министрлігінің 2025 жылғы республикалық тамыз саммитінің қарары таныстырылды. Өңірдің білім саласының дамуы мен алдағы міндеттері баяндалып, ауыл мектептерін цифрландыру жобасының нәтижелері, жаңа оқу жылындағы басымдықтар мен жасанды интеллекттің мүмкіндіктері, педагог даярлау жүйесін жетілдіру жолдары ұсынылды. Сонымен қатар үздік педагогтердің тәжірибелері мен баяндамалары тыңдалды.

Облыс әкімі Асхат Шахаров сөзінде өңір ұстаздарына жаңа оқу жылында табыс тілеп, білім беру саласына мемлекет тарапынан жан-жақты қолдау көрсетілетінін атап өтті.