Ақтөбе облысында жол жобалары – қатаң бақылауда

Облыс әкімі Асхат Шахаровтың төрағалығымен өткен жиында жол инфрақұрылымы саласындағы жобалардың жүзеге асырылу барысы талқыланды. Кездесуде жергілікті және республикалық маңызы бар автожолдардың құрылысы мен жөндеу жұмыстары, сондай-ақ Ақтөбе қаласының көше-жол желісін абаттандыру мәселелері басты назарға алынды.

Облыстық жолаушылар көлігі және автомобиль жолдары басқармасының басшысы Айбек Қайырдың мәліметінше, биыл өңірдің жол-көлік инфрақұрылымын дамытуға 60,4 млрд теңге бөлінді. Оның ішінде республикалық бюджеттен – 7,5 млрд теңге, облыстық бюджеттен – 41,9 млрд теңге, ал қалалық және аудандық бюджеттерден – 11,3 млрд теңге қарастырылған.

Бұл қаражатқа жалпы ұзындығы 509 шақырымнан асатын 183 жоба іске асырылуда. Оның 36-сы (284 км) жергілікті маңызы бар жолдарға, 147-сі (225 км) қалаішілік және ауылішілік жолдарға тиесілі. Қазіргі уақытта жұмыстардың шамамен 25,2%-ы орындалды: 123 шақырым жолға асфальт төселді, 309 шақырымнан астам учаскеде негіз дайындау аяқталған.

Құрылыс материалдарының қажетті көлемі алдын ала әзірленген: битумның жартысы, ірі құм, шағал қоры жеткізілген. Алайда, облыс әкімі бірқатар ауданда қаржы игеру қарқыны төмен екенін атап өтті. Атап айтқанда, Ырғыз, Темір, Ойыл, Мұғалжар және Хромтау аудандарында жұмыстар 11%-дан 29%-ға дейін ғана орындалған.

Асхат Шахаров аудан әкімдеріне жол құрылысына бақылауды күшейтуді және бекітілген кестеге сәйкес жұмыс жүргізуді тапсырды.

«Қаржы бөлінді, жобалар бекітілген, бірақ кейбір өңірлерде жұмыс қарқыны алаңдатады. Бұған жол беруге болмайды. Әңгіме тек жайлылықта емес, алда келе жатқан қыс мезгіліне байланысты тұрғындардың қауіпсіздігі туралы болып отыр», – деді облыс әкімі.

Жол сапасын бақылау мақсатында ҚР Ұлттық жол активтері сапасы орталығымен келісімшарттар жасалған. Биыл 166 нысан тексеріліп, оның 92-сінде ескерту анықталған. 546 зертханалық сынақ жүргізіліп, 94 жағдайда ақаулар тіркелді. Барлық заңбұзушылық бақылауға алынды, мердігерлерге тиісті нұсқамалар берілді.

Ақтөбе қаласы әкімінің орынбасары Жұлдызбек Бисембиннің айтуынша, биыл қалада 93 млрд теңге бөлінген 44 жобаны іске асыру жоспарланған. Алдымен мектептерге баратын жолдарды, аулалар мен көше-жол желісін жөндеу және қайта жаңғырту көзделген.

Атап айтқанда, Елек өзені арқылы өтетін көпірден «Кірпішті» тұрғын алабына және «Ақтөбе – Орск» тас жолына дейінгі жолды қайта жаңарту, Елек өзені мен Зинченко көшесіндегі көпірлерді жөндеу қарастырылған. Сондай-ақ, «Кірпішті», «Ақжар-2», «Қызылжар-3» сынды 14 тұрғын алаптарда жаңа жолдар салынуда. Жалпы 151 шақырым жол төселеді.

Сонымен қатар, 13 мектепке кіреберіс жол салынады, 28 шақырым жолға күрделі жөндеу, 15 көше мен даңғылға орташа жөндеу жүргізіледі. Бұдан бөлек, 4 кезеңмен аулаларды абаттандыру жұмыстары жалғасады. Бұл мақсатқа 4,1 млрд теңге бөлінген.

Жиында республикалық трассалардың жай-күйіне де назар аударылды. «ҚазАвтоЖол» ҰК» АҚ облыстық филиалының директоры Айбол Данағұлдың айтуынша, облыс аумағында республикалық маңызы бар 1869 шақырым автожол өтеді. Қазір «Ақтөбе – Қарабұтақ – Ұлғайсын» жолының 28 шақырымы қайта жаңартылуда. Биыл 13 шақырым негіз, 9 шақырым төменгі қабат төселген. Жұмысты «Сине Мидас Строй» ЖШС жүргізуде. Жыл соңына дейін бір қозғалысты ашу жоспарланған.

Сондай-ақ, «Қандыағаш – Шалқар», «Ақтөбе – Орск», «Қарабұтақ – Қостанай» трассаларының учаскелерінде орташа және күрделі жөндеу жұмыстары жүріп жатыр. Жем өзені арқылы өтетін көпірді жөндеу басталды, ал 2026 жылы Қауылжыр өзені арқылы өтетін көпірге күрделі жөндеу жүргізіледі. Сонымен қатар, жол белгілері орнатылып, сызықтар сызылып, қоршаулар мен су бұру жүйелері жөнделуде. 15 автоматтандырылған таразы бекетін орнатуға жобалық-сметалық құжаттама әзірленіп жатыр.

Жиын қорытындысы бойынша облыс әкімі жол құрылысы нысандарында сапа, мерзім және қауіпсіздік – басты талап болып қала беретінін атап өтті. Әр жоба тиімді әрі уақытылы жүзеге асуы үшін барлық бағытта бақылау күшейтіледі.

«Жол инфрақұрылымын дамыту – басты басымдықтарымыздың бірі. Әсіресе, шалғай елді мекен тұрғындарына сапалы және қолжетімді жол қажет екенін жақсы түсінеміз. Барлық жоба кезең-кезеңімен, сапа мен мерзімге тұрақты бақылаумен іске асырылуда. Біздің міндетіміз – тек асфальт төсеу емес, адамдар үшін қауіпсіз әрі жайлы орта қалыптастыру», – деді Асхат Шахаров.