Tasqyn ақпараттық жүйесі еліміздің 10 облысындағы су тасқыны жағдайын болжауға мүмкіндік берді

Тasqyn ақпараттық жүйесі ағымдағы жылдың 14 наурызы мен 18 сәуірі аралығында Қазақстанның 10 облысындағы су тасқыны жағдайын болжап, модельдеді. Бұл жергілікті атқарушы органдар мен төтенше жағдайлар департаменттеріне еріген қар суының түсуіне дайындалуға және ауқымды су тасқынының алдын алуға мүмкіндік берді, деп хабарлайды ҚР Су ресурстары және ирригация министрлігі. Модельдеу Батыс Қазақстан, Ақтөбе, Қостанай, Солтүстік Қазақстан, Павлодар, Шығыс Қазақстан, Ақмола, Қарағанды, сондай-ақ Абай және Ұлытау облыстарының елді мекендерінде жүргізілді. Бұл ретте жүйе Ақмола және Солтүстік Қазақстан облыстарының іс жүзінде су басқан 16 елді мекенінің 9 -. болжады. Tasqyn жүйесі өзендердегі болжамды шығындар мен су деңгейлерін, су қоймаларынан су ағызу көлемін, цифрлық жер бедері үлгілерін және тасқын суларды модельдеу кезінде батиметриялық зерттеу деректерін пайдаланады. Су ресурстары және ирригация министрлігі Су тасқыны кезінде су объектілерінің жай-күйіне ақпараттық жүйеге деректерді күнделікті енгізу және жаңарту арқылы мониторинг жүргізді. Сондай-ақ, ведомство шекаралас елдермен өзара іс-қимылды жүзеге асырды және ТЖМ мен оның аумақтық бөлімшелерін төтенше жағдайлардың туындау қаупі туралы уақтылы хабардар етті. "Болжамдардың дәлдігін арттыру және Tasqyn жүйесін қамтуды кеңейту үшін уәкілетті мемлекеттік органдар оны одан әрі дамыту жөнінде ұсыныстар әзірледі. Жол картасының жобасы әзірленді, оған цифрлық рельефтің айқындылығын арттыруға, гидрологиялық модельді жетілдіруге және бейімдеуге, жүйені жаңғыртуға бағытталған іс-шаралар енгізілді. Tasqyn ақпараттық жүйесін жетілдіру жұмыстары тұрақты негізде жүргізілуде және алдағы уақытта да жалғасатын болады", – деді су ресурстары және ирригация вице-министрі Аслан Әбдірайымов.