Өскемен мұғалімдеріне қаржылық пирамидалардың құрбаны болмаудың жолдары түсіндірілді
Өскемен қаласы әкімдігінде өңірдегі педагогтармен ауқымды кездесу өтті. Басқосудың негізгі тақырыбы – алаяқтықтың алдын алу және қаржылық пирамидаларға қарсы іс-қимыл. Іс-шара республикалық «Заң мен тәртіп» бағдарламасы аясында ұйымдастырылды.
«STOP, ПИРАМИДА!» атты кездесу білім саласы қызметкерлерінің қаржылық сауаттылығын арттыру мақсатында өтті. Педагогтарды таңдау кездейсоқ емес. Олар – қоғамдық пікір көшбасшылары. Сондықтан алған ақпаратты тек әріптестері арасында ғана емес, оқушылар мен олардың ата-аналарына да жеткізе алады.
Кездесу барысында құқық қорғау органдары мен қаржылық мониторинг қызметінің мамандары қазіргі қаржылық пирамидалардың қалай жұмыс істейтінін жан-жақты түсіндірді. Әсіресе әлеуметтік желілер мен мессенджерлер арқылы жүргізілетін агрессивті жарнамаға назар аударылды. Мұндай платформаларда алаяқтар қысқа уақыт ішінде жоғары табыс табуды уәде етіп, азаматтарды алдайды.
2021 жылдан бері Қазақстан бойынша 100-ден астам қаржылық пирамиданың қызметі тоқтатылды. Оның ішінде Шығыс Қазақстан облысында да екі жағдай тіркелген. Бұл ұйымдар бастапқыда ірі қалаларда жұмысын бастап, кейін өңірлерге таралған. Аталған істер бойынша кінәлі тұлғалар жауапкершілікке тартылды, – деді ШҚО бойынша Экономикалық тергеп-тексеру департаментінің аса маңызды істер жөніндегі тергеушісі Жандос Мұзтауов.
Ол қаржылық пирамидалармен күресте алдын алу шараларының маңызы зор екенін атап өтті. Мұндай жұмыстар халықты күмәнді жобаларға тартылудан қорғаудың ең тиімді жолдарының бірі саналады.
– Бүгін айтылған ақпарат өте маңызды әрі өзекті. Қазір алаяқтардың құрбаны болып жатқан адамдар саны аз емес. Олар үнемі жаңа тәсілдер ойлап табады, тіпті жасанды интеллектіні де белсенді қолдануда. Сондықтан кез келген адам оп-оңай алдануы мүмкін, – деді бастауыш сынып мұғалімі Ольга Чиркина. – Мен кіші сынып оқушыларымен жұмыс істеймін. Соған қарамастан балаларға қаржылық сауаттылықтың негіздерін ерте жастан үйрету қажет. Олар бөтен адамдарға жеке мәліметтерін бермеуді білуі тиіс. Мұндай білімді бірінші сыныптан бастап қалыптастыру керек деп ойлаймын.
Іс-шара барысында қатысушыларға күмәнді ұйымдарға тап болған жағдайда қандай әрекет жасау керектігі түсіндірілді. Сондай-ақ педагогтарға компанияларды тексеруге мүмкіндік беретін «Baiqa, piramida!» Telegram-ботын пайдалану ұсынылды.
Мемлекет басшысының бастамасымен қолға алынған «Заң мен тәртіп» бағдарламасы қоғамда құқықтық тәртіпті нығайтуға және кез келген заң бұзушылыққа төзбеушілік қағидатын қалыптастыруға бағытталған.
Осындай кездесулер алдағы уақытта да жалғасып, өңір тұрғындарын қаржылық алаяқтардың әрекетінен барынша қорғауға ықпал етпек.