Үй өнімдері, халықтық атмосфера және жергілікті өндірушілерді қолдау: Өскеменде «Туған жер – алтын бесігім» жәрмеңкесі өтіп жатыр

Бүгін Өскемен қаласының тұрғындары мен қонақтары «Алтай» КБО аумағында өтіп жатқан ауыл шаруашылық жәрмеңкесіне асыға келуде. Іс-шара «Туған жер – алтын бесігім» жобасы аясында ұйымдастырылып, «Тұғырлы Тарбағатайдан Асқарлы Алтайға» атты тақырыппен өтуде.

Жәрмеңке таңғы сағат 07:00-де басталды. Шараның негізгі мақсаты – қала тұрғындарын қолжетімді бағамен сапалы әрі экологиялық таза ауыл шаруашылығы өнімдерімен қамтамасыз ету және Тарбағатай ауданында өндірілген тауарларды тікелей тұтынушыға жеткізу.

Тарбағатай ауданынан әкелінген өнімдердің көлемі айтарлықтай мол. Сауда сөрелерінде: 4,5 тонна сиыр еті (қол, сан, төс) – 3300 тг/кг; 1,5 тонна жылқы еті – 3100 тг/кг; қой еті – 3000 тг/кг ұсынылуда. Сатып алушылар картоп, пияз, орамжапырақ, табиғи таза сары май және сүт өнімдерінің кең таңдауы мен сапалы түрлерін сатып алып жатыр. Сонымен қатар, Тарбағатайдың балық өнімдері де қолжетімді бағамен саудаланып жатыр. Бағалары 600 теңгеден 1200 теңгеге дейін белгіленген.

Жәрмеңке аясында сағат 09:00-де «Дала дәмі – ел несібесі» атты концерттік бағдарлама басталып, ұлттық спорт түрлерінен сайыстар ұйымдастырылуда.